 |  شعیب ملک کے اوپننگ کرنے کی صورت میں سلمان بٹ کی ٹیم میں شمولیت مشکل دکھائی دے رہی ہے |
پاکستان نے ویسٹ انڈیز کے خلاف جمیکا میں ہونے والے دوسرے ٹیسٹ کے لیے ٹیم میں دو تبدیلیاں کی ہیں۔ پاکستان نے پہلے ٹیسٹ میں ٹیم سے باہر رہنے والے کپتان انضمام الحق اور آل راؤنڈر شعیب ملک کو بازید خان اور سلمان بٹ کی جگہ ٹیم میں شامل کیا ہے۔ اطلاعات کے مطابق شعیب ملک یاسر حمید کے ساتھ اوپن کریں گے جبکہ کپتان انضمام الحق مڈل آرڈر میں اپنی ذمہ داری پوری کریں گے۔ شعیب ملک نے حال ہی میں اختتام پذیر ہونے والے ون ڈے سیریز کے پہلے میچ میں تیرہ جبکہ دوسرے میچ میں اکاون رنز بنائے تھے۔ وہ تیسرے میچ میں کھیلنے والے پاکستان سکوارڈ کا حصہ تو تھے لیکن انہوں نے بیٹنگ نہیں کی تھی۔ پاکستان نے اپنے بالنگ اٹیک میں کوئی تبدیلی نہیں کی ہے اور فاسٹ بالنگ کے شعبے میں شبیر احمد، نوید الحسن رانا اور عبدالرزاق کو برقرار رکھا ہے۔ سپن بالنگ کے شعبے میں اب ٹیم کو دانش کنیریا اور شاہد آفریدی کے ساتھ ساتھ شعیب ملک کی خدمات بھی دستیاب ہوں گی۔ ٹیم مینجمنٹ کے مطابق پاکستانی کھلاڑی مرحوم فضل محمود کی یاد میں کالی پٹیاں باندھ کر میدان میں اتریں گے اور انہیں خراج تحسین پیش کرنے کے لیے میچ شروع ہونے سے پہلے ایک منٹ کی خاموشی اختیار کی جائے گی۔ دوسری طرف ویسٹ انڈیز نے پہلے ٹیسٹ میں زخمی ہونے والے تیز بولر فیڈل ایڈورڈز کی جگہ ٹینو بیسٹ کو ٹیم میں شامل کیا گیا ہے۔ فیڈل ایڈورڈز جنہوں نے باربیڈوس ٹیسٹ کی پہلی اننگز میں پانچ پاکستانی کھلاڑیوں کو آؤٹ کر کے ویسٹ انڈیز کی جیت کی راہ ہموار کر دی تھی دوسری اننگز میں ایک وکٹ حاصل کرنے کے بعد ہیمسٹرنگ کی وجہ سے گراؤنڈ سے باہر چلے گئے تھے۔ وہ میچ کے چوتھے دن بھی کھیلنے کے لیے نہیں آئے۔ ویسٹ انڈیز نےفیڈل ایڈورڈز کی جگہ ٹینو بیسٹ کو کھلانے کے علاوہ ٹیم میں اور کوئی تبدیلی نہیں کی ہے اور وہی ٹیم جمیکا کے سبینا پارک میں تین جون کو ہونےوالے دوسرا ٹیسٹ میچ کھیلے گی جو باربیڈوس میں پہلا ٹیسٹ کھیلی تھی۔ ویسٹ انڈیز نے پہلا ٹیسٹ پاکستان کی دو سو چھہتر رنز سے ہرا دیا تھا۔ پاکستان کی ٹیم: انضمام الحق (کپتان)، یاسر حمید، شعیب ملک، شاہد آفریدی، یونس خان، عاصم کمال، عبدالرزاق، کامران اکمل، نوید الحسن رانا، شبیر احمد، اور دانش کنیریا۔ ویسٹ انڈیز کی ٹیم: کرسٹوفر گیل، ڈیون سمتھ، رام ناریش ساروان، برائن لارا، شیو نارائن، چندرپال، ویول ہائنڈز، ڈوین براوو، کورٹنی براؤن، ڈیرن پاول، ریون کنگ، کوری کولیمور، آئین بریڈ اور ٹینو بیسٹ شامل ہیں۔ | 
یہ صفحہ دوست کو ای میل کیجیئے
پرِنٹ کریں
