 |  شاہد آفریدی نے سینچری 75 گیندوں پرنو چوکوں اور پانچ چھکوں کی مدد سے مکمل کی |
باربیڈوس میں پاکستان اور ویسٹ انڈیز کے درمیان ہونے والے دو ٹیسٹ میچوں کی سیریز کے پہلے ٹیسٹ میچ میں چوتھے دن لنچ کے وقفے تک پاکستان نے 274 رنز بنائے ہیں اور اس کے چھ کھلاڑی آؤٹ ہوچکے ہیں۔ اس وقت وکٹ پر 41 رنز بنانے کے بعد عبدالرزاق موجود ہیں اور ان کا ساتھ دے رہے ہیں کامران اکمل جنہوں نے پانچ رنز بنائے ہیں۔ چوتھے روز کی خاص بات شاہد آفریدی کی سنچری تھی۔ انہوں نے نو چوکوں اور چھ چھکوں کی مدد سے 122 رنز بنائے اور پھر پاول کی گیند پر ایک اونچا شاٹ کھیلتے ہوئے چندرپال کے ہاتھوں کیچ آؤٹ گئے۔ واضح رہے کہ یہ شاہد آفریدی کی تیسری ٹیسٹ سنچری ہے۔ انہوں نے اس میچ میں ٹیسٹ کرکٹ میں اپنے ہزار رنز بھی مکمل کیے۔ اس سے قبل وہ سترہ ٹیسٹ میچوں میں دوسنچریاں اور چھ نصف سنچریاں بنا چکے ہیں۔ چوتھے روز آؤٹ ہونے والے پہلے کھلاڑی عاصم کمال تھے جو اپنی ففٹی بنانے کے پانچ سکور کے بعد ہی کرس گیل کی ہی گیند پر ڈیون سمتھ کے ہاتھوں کیچ آؤٹ ہوئے۔ انہوں نے اپنی اننگز میں آٹھ چوکے اور ایک چھکا لگایا۔ کل ویسٹ انڈیز کی ٹیم 371 رنز بنا کر آؤٹ ہو گئی تھی۔ اور اس طرح پاکستان کو میچ برابر کرنے کے لیے 572 رنز اور جیتنے کے لیے 573 رنز کا ٹارگٹ دیا تھا۔ پاکستان نے چوتھے دن کے پہلے گھنٹے میں ایک وکٹ کے نقصان پر 97 رنز بنائے۔ جبکہ لنچ تک دو وکٹ کھونے کے بعد 161 رنز بنائے۔ جب کھیل شروع ہوا تو دوسرا اوور ہی کرس گیل کو دے دیا گیا جن کی پہلی ہی گیند پر شاہد آفریدی نے ایک اونچا شاٹ کھیلا اور ڈیون سمتھ نے باؤنڈری لائن پر ایک آسان کیچ ڈراپ کر دیا۔ آفریدی نے اپنی ففٹی کولیمور کو ایک لمبا چھکا مار کر بنائی اور سنچری بھی ایک بڑی ہٹ لگا کر بنائی جو کچھ فاصلے سے چھکا ہوتے ہوتے رہ گئی۔ انہوں نے اپنی سنچری 78 گیندوں پر نو چوکوں اور چار چھکوں کی مدد سے بنائی۔ تیسرے دن کے اختتام پر شاہد آفریدی 32 رنز پر کھیل رہے تھے جبکہ ان کے ساتھ عاصم کمال نے 38 رنز بنائے تھے۔ پاکستان کی ٹیم: یاسر حمید، سلمان بٹ، شاہد آفریدی، بازید خان، یونس خان، عبدالرزاق، کامران اکمل، عاصم کمال، دانش کنیریا، رانا نوید، شبیر احمد اور شاہد نذیر بارہویں کھلاڑی ہیں۔ ویسٹ انڈیز کی ٹیم: کرسٹوفر گیل، ڈیون سمتھ، رام ناریش ساروان، برائن لارا، شیو نارائن، چندرپال، ویول ہائنڈز، کورٹنی براؤن، ڈیرن پاول، فیڈل ایڈورڈز، ریون کنگ، کوری کولیمور شامل ہیں جبکہ آئین بریڈشا بارہویں کھلاڑی ہیں۔ | 
یہ صفحہ دوست کو ای میل کیجیئے
پرِنٹ کریں
