 |  بھارت کے دورے کے دوران پاکستان کو تیز گیند بازوں کی ضرورت ہے |
شعیب اختر بھارت کے خلاف ون ڈے سیریز بھی شاید نہ کھیل سکیں۔ وہ ابھی تک مکمل طور پر فٹ نہیں ہیں۔ پاکستان کرکٹ ٹیم کے دورہ بھارت کے آغاز سے قبل شیعب اختر نے اس امید کا اظہار کیا تھا کہ وہ ون ڈے سیریز کے لیے فٹ ہو جائیں گے۔ پاکستان کے ایک انگریزی اخبار کو انٹرویو دیتے ہو ئے شعیب اختر نے کہا ڈاکٹر کہتا ہے کہ کم از کم تین ہفتے بعد وہ نیٹ پریکٹس کرنے کے قابل ہو سکیں گے۔ پاکستان ٹیم کے کوچ سلیم الطاف نے اسی اخبار کو ایک روز پہلے بتایا تھا کہ شعیب کی میڈیکل رپورٹ مثبت ہیں۔ شعیب نے کہا کہ مثبت میڈیکل رپورٹ کی خبریں افواہوں پر مبنی ہیں۔ پاکستان کے انتیس سالہ تیز رفتار بالر شعیب اختر آسٹریلیا میں ایک میچ کے دوران پٹھ چڑھ جانے کی وجہ اپنا دورہ ادھورا چھوڑ کر وطن واپس لوٹ آئے تھے۔ ادھر شعیب اختر کے بارے میں پاکستان کرکٹ بورڈ کے صدر شہریار نے کہا ہے کہ فاسٹ بولر کا فٹنس ٹیسٹ لیا جائے گا جو گراہم کامپٹن لیں گے اور یہ فٹنس ٹیسٹ چند روز تک ہو گا۔ شعیب اس وقت ٹرینرگراہم کامپٹن کے ساتھ ٹریننگ کر رہے ہیں لیکن گراہم کامپٹن کا کہنا ہے کہ ابھی وہ مکمل طور پر فٹ نہیں ۔ شہر یار خان کے بقول جب شعیب فٹ نس ٹیسٹ پاس کر لیں گے تو انہیں ایک میچ کھیلنا ہو گا اگر اس میچ میں انہوں نے اپنی فٹنس ثابت کر دی تو ٹیم میں شامل کرنے کے قابل سمجھا جائے گا اس کے بعد آخری فیصلہ سلیکشن کمیٹی کا ہو گا کہ وہ انہیں کب بھجواتی ہے۔امید ہے کہ ٹیسٹ میچز میں تو نہیں البتہ ایک روزہ میچز میں وہ بھارت جا سکیں گے۔
| 
یہ صفحہ دوست کو ای میل کیجیئے
پرِنٹ کریں
