شعیب کےبولنگ ایکشن پرگزشتہ اکتوبرمیں دوسری بار اعتراض کیا گیا تھا

پاکستان کرکٹ بورڈ کے سربراہ شہریارخان نے خبر رساں ادارے رائٹرز کو بتایا کہ ’ ہم نے آئی سی سی کو شعیب ملک کے بولنگ ایکشن پر ویسٹرن آسٹریلیا یونیورسٹی کی بایومکینک رپورٹ بھیج دی ہے‘۔

ان کا یہ بھی کہنا تھا کہ ’ ہم نے کرکٹ بورڈ کی غیر قانونی بولنگ ایکشن کمیٹی کی رپورٹ بھی روانہ کی ہے اور ہم چاہتے ہیں کہ آئی سی سی دورہ بھارت سے قبل شعیب پر عائد پابندی اٹھ لے‘۔

تئیس سالہ شعیب ملک آف سپن بولر ہیں اور ان کے بولنگ ایکشن پرگزشتہ اکتوبرمیں دوسری بار اعتراض کیا گیا تھا۔ شعیب کے ایکشن کو اس سے قبل 2000 میں بھی متنازعہ قرار دیا گیا تھا۔

شعیب ملک دو بار پرتھ انسٹیٹیوٹ میں بایو مکینک ماہر بروس ایلیٹ اور بولنگ کوچ ڈیرل فوسٹر کی زیرِ نگرانی دو تربیتی سیشن میں حصہ لے چکے ہیں۔

اس بات کو جاننے کے بعد کہ شعیب مقررہ حد سے زیادہ کہنی موڑتے ہیں ان ماہرین نے پاکستان کرکٹ بورڈ کو کہا کہ وہ بولنگ ایکشن میں تبدیلی تک شعیب کو بولنگ نہ کرنے دیں۔

اس معاملے میں شہر یار کا کہنا ہے کہ ’ دو برس قبل ہونے والے ایک ایکسیڈنٹ کے نتیجے میں شعیب اپنی کہنی کے ٹنڈن پر قابو کھو بیٹھے ہیں جس کی وجہ سے یہ مسئلہ درپیش ہے اور ہم نے آئی سی سی سے کہا ہے کہ وہ طبی بنیادوں پر شعیب کو بولنگ کی اجازت دے۔