سلمان بٹ نے تمام ہی آسٹریلوی بالروں کا اعتماد سے سامنا کیا ہے

اس وقت کامران اکمل جنہوں نے پینتیس رن بنائے ہیں اور محمد آصف بیٹنگ کر رہے ہیں۔

پاکستان کی طرف سے سلمان بٹ اور یاسر حمید نے اننگز کا آغاز کیا ہے اور پہلی وکٹ کی شراکت میں 102 رنز بنائے۔ پاکستان کی دوسری وکٹ ایک سو ترانوے پر گری اور بعد میں آنے والے کھلاڑی زیادہ دیر وکٹ پر نہیں ٹھہر سکی۔

آسٹریلیا کی طرف سے میکگل نے پانچ اور میگرا نے تین کھلاڑی آؤٹ کیے۔

یاسر حمید58 رنز بنا کر شین وارن کی گیند پر مائیکل کلارک کے ہاتھوں کیچ ہو گئے۔

پاکستان کی طرف سے آؤٹ ہونے والے دوسرے کھلاڑی یونس خان تھے۔ وہ چھیالیس رنز بناکر میکگل کی گیند پر میگرا کے ہاتھوں کیچ ہو گئے۔

پاکستان کے تیسرے آؤٹ ہونے والے کھلاڑی کپتان یوسف یوحنا تھے جو 8 رنز بنا کر میکگل کی گیند پر شین وارن کے ہاتھوں کیچ ہوئے۔

پاکستان کی طرف سے آؤٹ ہونے والے چوتھے کھلاڑی سلمان بٹ تھے جو ایک سو آٹھ رنز بنا کر گلین میگرا کی گیند پر وکٹ کیپر گلکرائسٹ کے ہاتھوں کیچ ہوئے۔

عاصم کمال بھی زیادہ دیر تک کریز پر نہ ٹھہر سکے اور میکگل کی گیند پر کلیسپی کی ہاتھوں کیچ ہو گئے۔

پاکستان کی طرف سے آؤٹ ہونے والے چھٹے کھلاڑی شاہد آفریدی تھے۔ وہ بارہ رنز بنا میکگل کی گیند پر میگرا کے ہاتھوں کیچ ہوگئے۔

دو سو اکسٹھ کے سکور پر ہی نویدالحسن اور شعیب اختر میگرا کی گیند پر پویلین لوٹ گئے۔ دانش کنیریا تین رن بنا کر آؤٹ ہوئے۔

انضمام الحق کی غیر موجودگی میں یوسف یوحنا ہی ٹیم کی قیادت کر رہے ہیں۔ سڈنی ٹیسٹ کے لیے پاکستان نے اپنی ٹیم میں چار تبدیلیاں کی ہیں۔ عمران فرحت، محمد سمیع، شعیب ملک اور عبدالرزاق کی جگہ عاصم کمال، شاہد آفریدی، نویدالحسن اور محمد آصف کو ٹیم میں شامل کیا گیا۔

آسٹریلیا نے بھی ٹیم میں دو تبدیلیاں کی ہیں اور لہمین اور کیسپرووچ کی جگہ شین واٹسن اور سٹیورٹ میکگل کو ٹیم میں شامل کیا ہے۔

پاکستان: سلمان بٹ، یاسر حمید، یونس خان، یوسف یوحنا، عاصم کمال، شاہد آفریدی، کامران اکمل، نویدالحسن رانا، شعیب اختر، دانش کنیریا اور محمد آصف۔

آسٹریلیا: جسٹن لینگر، میتھیو ہیڈن، رکی پونٹنگ، ڈیمیئل مارٹن، مائیکل کلارک، شین واٹسن، گلکرائسٹ، شین وارن، جیسن گلیسپی، سٹیورٹ میکگِل اور گلین میگرا۔