اس میچ میں دانش کنیریا کی کارکردگی قابلِ ذکر رہی

اس دورہ کے افتتاحی میچ میں جنوبی آسٹریلیا کی سیکنڈ الیون نےپاکستان کو دس رنز سے شکست دے دی ہے۔

پاکستانی بیٹنگ اس میچ کی دوسری اننگز میں بری طرح ناکام ہو گئی۔صرف یوسف یوحنا اور یونس خان ہی ڈبل فگرز میں داخل ہوسکے انہوں نے بالترتیب اکتالیس اور اٹھائیس رنز بنائے۔

اگرچہ دانش کنیریا کی شاندار بولنگ کے نتیجے میں پاکستان کو جیت کے لیے صرف چورانوے رنز کا ہدف ملا تھا لیکن اس کے تمام کھلاڑی صرف تراسی رنز پر آؤٹ ہو گئے۔

جنوبی آسٹریلیا کی دوسری اننگز میں دانش کنیریا نے پینتالیس رن کے عوض سات وکٹیں حاصل کی تھیں جبکہ آسٹریلیا کی جانب سے بیس سالہ جسٹن کوئٹزی نے تیئیس رنز دے کر پانچ کھلاڑیوں کا آؤٹ کیا۔

پاکستان اس دورے کا باقاعدہ آغاز سولہ دسمبر سے شروع ہونے والے ٹیسٹ سے کرے گا۔لیکن ایسا معلوم ہوتا ہے کہ پاکستانی ٹیم کو مزید پریکٹس کی ضرورت ہے۔

پاکستانی کوچ باب وولمر نے کہا ہے کہ وہ ٹیم کی خراب فارم کی وجہ سے فکر مند ہیں۔ان کا کہنا تھا کہ ’ اس میچ سے ہمارے نوجوان اور تجربہ کار دونوں طرح کے بلے بازوں کی خامیاں سامنے آئی ہیں‘۔