سپریم کورٹ کے سابق جج جسٹس موہن تحقیقات مکمل ہونے تک بی سی سی آئی کے معاملات چلائیں گے

عدالت نے سپریم کورٹ کے ایک ریٹائرڈ جج کو کرکٹ بورڈ کا عبوری ایڈمنسٹریٹر مقرر کیا ہے۔

سپریم کورٹ کے سابق جج جسٹس موہن تاحکم ثانی بی سی سی آئی کے معاملات چلائیں گے۔

مدراس ہائی کورٹ نے جمعہ کے روز یہ حکم نیتاجی کرکٹ کلب کی طرف سے دائر کی جانے والی ایک پیٹیشن پر دیا۔

حال ہی میں ہونے والے انتخابات میں رنبیر مہندرہ وفاقی وزیر شرد پوار کو ہرا کر بھارتی کرکٹ بورڈ کے صدر منتخب ہوئے تھے۔ بھارتی کرکٹ بورڈ کے سابق صدر جگموہن ڈالمیا نے اپنا فیصلہ کن ووٹ رنبیر مہندرہ کے حق میں استعمال کیا تھا۔

مدراس ہائی کورٹ نے گزشتہ ماہ مسٹر جسٹس موہن کو بھارتی کرکٹ بورڈ کے انتخابات کے سلسلے میں نگران مقرر کیا تھا۔ انہیں کہا گیا تھا کہ وہ اس امر کو یقینی بنائیں کہ کرکٹ بورڈ کے عہدیدار کسی امیدوار یا ووٹر کو نااہل قرار نہ دیں۔

عدالت نے بعد میں یہ حکم کرکٹ بورڈ کی اس یقین دہانی پر واپس لیا تھا کہ کسی امیدوار کو نااہل قرار نہیں دیا جائے گا۔

نیتا جی کرکٹ کلب کی وکیل نلنی چدنمبرن کے مطابق بھارتی کرکٹ بورڈ نے عدالت کو دی گئی یقین دہانی کے باوجود مہاراشٹرہ کرکٹ ایسوسی ایشن کے ارکان کو ووٹ ڈالنے کے لیے نااہل قرار دیا۔