عبدالرشید شکور بی بی سی اردو ڈاٹ کام، کراچی

سری لنکا کی ٹیم مرلی دھرن کے بغیر بھی مضبوط حریف ثابت ہوگی:انضمام

سری لنکا کی کرکٹ ٹیم پاکستان میں دو ٹیسٹ سیریز اور ایشین ٹیسٹ چیمپئن شپ کا فائنل جیت چکی ہے اور کپتان مرون اتاپتو اس دورے کو بھی جیت سے یادگار بنانے کی خواہش رکھتے ہیں۔

مرلی دھرن سری لنکا کی ٹیم میں شامل نہیں ہیں۔ کپتان انضمام الحق کے مطابق مرلی دھرن کے بغیر بھی سری لنکن ٹیم ایک بڑا خطرہ ہے۔

انضمام الحق جو ٹانگ کی تکلیف کے سبب پشاور کا میچ نہیں کھیلےتھے فٹ ہوگئے ہیں۔ ایک میچ کے آرام کے بعد شعیب اختر اور عبدالرزاق کی واپسی سے بھی پاکستانی ٹیم کو تقویت ملے گی۔

معین خان کے بدستور بیمار ہونے کے سبب وکٹ کیپنگ کا فریضہ پشاور میچ کے مین آف دی میچ یونس خان ہی سنبھالیں گے۔

سری لنکن ٹیم اتاپتو، جے سوریا اور جے وردھنے جیسے تجربہ کار بیٹسمینوں اور واس، زویسا فرنینڈو جیسےموثر بولرز کی موجودگی میں متوازن ہے جبکہ اسپن بولنگ کا شعبہ چندانا اور لوکوآراچی سنبھالے ہوئے ہیں۔