عبدالرشید شکور بی بی سی اردو ڈاٹ کام کراچی

آْخری بیس میچوں میں 12 وکٹیں اور 215 رنز

پاکستان کرکٹ ٹیم کے لیے شبیراحمد کا ان فٹ ہوجانا اس لحاظ سے مایوس کن ہے کہ وہ حالیہ میچوں میں بہت اچھی کارکردگی کا مظاہرہ کررہے تھے۔ ان کی میڈیکل رپورٹس جنوبی افریقہ بھیجی جارہی ہیں اور وہ چھ ہفتے تک کرکٹ سے دور رہیں گے۔

شبیراحمد سےقبل نوجوان فاسٹ بولر عمرگل بھی کمر کی تکلیف سے دوچار ہوکر کرکٹ سے وقتی طور پر دور ہوچکے ہیں۔

شبیر احمد کی جگہ اظہرمحمود کی شمولیت پر شائقین، مبصرین اور ذرائع ابلاغ سب حیران ہیں کیونکہ یہ شمولیت پاکستان کرکٹ بورڈ کی سلیکشن کمیٹی کی نہیں بلکہ کوچ باب وولمر کی خواہش پر ہوئی ہے۔

آئی سی سی چیمپئنز ٹرافی کے لیے پاکستان کرکٹ ٹیم کے اعلان کے وقت سلیکشن کمیٹی کے چیئرمین وسیم باری نے کہا تھا کہ اظہرمحمود کو ٹیم میں شامل کرنے کا مطلب مستقبل کے بجائے ماضی کی طرف دیکھنا ہے۔

اظہرمحمود نے آخری 20 ون ڈے انٹرنیشنل میچوں میں 66ء55 کی اوسط سے12 وکٹیں حاصل کی ہیں اور 91ء17 کی اوسط سے 215 رنز بنائے ہیں۔