پیٹریاٹ میزائل کئی شہروں میں نصب

طیارہ شکن پیٹریاٹ میزائیل کے علاوہ ایتھنز کے ارد گرد سینکڑوں سیکیورٹی کیمرے لگائے گئے ہیں۔ اولمپک گیمز کی سیکیورٹی پر ایک بلین ڈالر صرف کیے جارہے ہیں جو اولمپک کی تاریخ میں سیکیورٹی پر خرچ کی جانیوالی سب سے بڑی رقم ہے۔

یونانی حکام نے امریکی ساخت کےپیٹریاٹ میزائیلوں کو گزشتہ ماہ یکم جولائی سے نصب کرنا شروع کردیا تھا۔ یہ میزائل انتیس اگست تک کھیلوں کے اختتام تک نصب رہیں گے۔

پولیس کے ذرائع نے بتایا کہ چار ہیلی کاپٹر جن میں سیکیورٹی کیمرے نصب ہیں، ایتھنز پر چوبیس گھنٹے نظر رکھیں گے۔

پیٹریاٹ میزائیل اور طیارہ شکن دیگر سیکیورٹی آلات یونان کے دوسرے شہروں میں بھی نصب کیے جارہے ہیں۔

روسی ساخت کے ایس تین سو طیارہ شکن میزائیل بھی یونان کے دوسرے شہروں میں نصب کیے گئے ہیں۔