 |  لاہور میں ٹکٹوں کی قیمت آدھی کرنے پر بھی تماشائی نہیں آئے |
پاک بھارت کرکٹ کو اس کی مقناطیسی کشش کے سبب ایشیز سے بڑی کرکٹ قرار دیا جاتا ہے لیکن جب پاکستان اور بھارت کے درمیان جاری ٹیسٹ سیریز پر نظرڈالتے ہیں تو تماشائیوں کی غیرمعمولی عدم دلچسپی دیکھ کر بڑی حیرت ہوتی ہے۔ ایسا محسوس ہوتا ہے کہ ون ڈے سیریز تمام تر سحر انگیزی لے اڑی ہے اور اب ٹیسٹ میچوں کے دوران میدان ویران پڑے ہیں۔ پاکستان کرکٹ بورڈ کے چیف ایگزیکٹیو رمیز راجہ اعتراف کرتے ہیں کہ پہلے ون ڈے سیریز ہوجانے سے اب ٹیسٹ میچوں میں شائقین کی دلچسپی برائے نام رہ گئی ہے۔ جب ان سے پوچھا گیا کہ پاکستان کرکٹ بورڈ نے پہلے ٹیسٹ سیریز کا فیصلہ کیا تھا پھر بھارتی کرکٹ بورڈ کی ٹیسٹ پہلے کھیلنے کی بات کیوں مان لی؟ توانہوں نے کہا کہ بھارت میں ہونے والے عام انتخابات کی وجہ سے بھارتی کرکٹ بورڈ چاہتا تھا کہ ون ڈے سیریز پہلے کھیلی جائے۔ پاکستان کرکٹ بورڈ نے لاہور ٹیسٹ میں شائقین کی توجہ حاصل کرنے کے لئے پہلے ہی ٹکٹوں کی قیمتیں نصف کردی تھیں لیکن اس کے باوجود قذافی اسٹیڈیم کے زیادہ تر اسٹینڈز خالی تھے۔ حالانکہ پندرہ سال کے طویل عرصے کے بعد اس میدان پر دونوں ٹیمیں ٹیسٹ میں مدمقابل ہیں۔ 79- 1978ء میں جب بھارتی ٹیم سترہ سال کے وقفے کے بعد پاکستان آئی تھی تو یہی قذافی اسٹیڈیم تماشائیوں سے بھرا ہوا تھا۔ پاکستان کرکٹ بورڈ کے چیئرمین شہریار خان نے ملتان ٹیسٹ میں شائقین کی عدم دلچسپی کا سبب ضرورت سے زیادہ سکیورٹی اور اسٹیڈیم کا شہر سے دور ہونا بتایا تھا۔ لیکن قذافی اسٹیڈیم کو دیکھ کرعام رائے یہ ہے کہ ون ڈے سیریز کے بعد پہلے ٹیسٹ میں بھی پاکستان کی شکست سے شائقین روٹھ گئے ہیں جنہیں صرف جیت ہی کے ذریعے منایا جا سکتا ہے۔ | 
یہ صفحہ دوست کو ای میل کیجیئے
پرِنٹ کریں
