یہ صفحہ دوست کو ای میل کیجیئے		پرِنٹ کریں

گراؤنڈ سے باہر جاتے ہوئے سٹیو وا کو تماشائیوں نے کھڑے ہوکر خراج تحسین پیش کیا

بھارت اور آسٹریلیا کے مابین سڈنی میں کھیلا جانے والا چوتھا اور آخری ٹیسٹ میچ برابر ہوگیا ہے جس کے ساتھ ہی یہ ٹیسٹ سیریز بھی ڈرا قرار پائی ہے۔

کُل چار ٹیسٹ میچز میں سے پہلا اور آخری میچ دونوں ٹیموں کے درمیان برابر رہا جبکہ ایک میچ آسٹریلیا نے اور ایک بھارت نے جیتا۔

آخری دن کے کھیل کے اختتام پر آسٹریلیا کا سکور چھ کے نقصان پر تین سو ستاون رن تھا جبکہ انیل کمبلے کے حصے میں آسٹریلیا کی چار وکٹیں آئیں۔

آسٹریلوی کھلاڑی سٹیو واہ نے ، جو اپنے ٹیسٹ کریئر کا آخری میچ کھیل رہے تھے، اپنی آخری اننگز میں اسی رن بنائے۔ گراؤنڈ سے باہر جاتے ہوئے انہیں تماشائیوں نے کھڑے ہوکر خراج تحسین پیش کیا۔ یہ ان کے کیریئر کا پچاسواں ٹیسٹ میچ تھا۔

آخری ٹیسٹ میچ کے دوران بھارت اور آسٹریلیا نے اپنی پہلی اننگز میں بالترتیب سات کے نقصان پر سات سو پانچ اور آل آؤٹ پر چار سو چوہتر رن سکور کئے جبکہ دوسری اننگز میں بھارت نے دو کے نقصان پر دو سو گیارہ رن اور آسٹریلیا نے چھ کے نقصان پر تین سو ستاون رن بنائے۔

فیصلہ کن میچ کے چوتھے روز انیل کمبلے نے عمدہ باؤلنگ کرکے آٹھ وکٹ لئے لیکن کپتان سورو گانگولی نےآسٹریلوی ٹیم کو فالو آن کرنے کے لئے نہیں کہا۔

آسٹریلیا سائمن کٹیچ کی سنچری کی بدولت چار سو چوہتر رن بنانے میں کامیاب ہو گیا تھا لیکن یہ سکور فالو آن سے بچنے کے لئے کافی نہیں تھا۔

چوتھے روز کے کھیل میں سائمن کٹیچ نے ایک سو پچیس رن بنا کر بھارتی فتح کے امکانات کو کافی حد تک کم کر دیا تھا جبکہ کٹیچ نے جیسن گلسپی کے ساتھ آٹھویں وکٹ کے لئے ایک سو سترہ رن کی شراکت کی۔ گلسپی نے سینتالیس رن بنائے۔

بھارت نےاپنی دوسری اننگز میں دو وکٹ پر دو سوگیارہ رن پر اننگز ختم کرنے کا اعلان کر دیا تھا۔

انیل کمبلے نے بہترین بالنگ کا مظاہرہ کرتے ہوئے چھیالیس اعشاریہ پانچ اووروں میں ایک سو اکتالیس رنز دے کر آسٹریلیا کے آٹھ کھلاڑیوں کو آؤٹ کیا۔ باقی دو وکٹیں عرفان پٹھان نے لیں۔

سوموار کے روز آسٹریلیا نے 342 رنز کے سکور پر اپنی اننگز دوبارہ شروع کی تو اس وقت اسے فالوآن سے بچنے کے لئے 164 رنز درکار تھے۔

بھارتی ٹیم کو کھیل کے آغاز پر ہی ایک کامیابی حاصل ہوئی جب آسٹریلوی بالر بریٹ لی بغیر کوئی رن بنائے انیل کمبلے کی گیند پر چوپڑہ کے ہاتھوں کیچ ہو گئے۔

اس کے بعد جیسن گلیسپی کھیلنے کے لئے آئے اور انہوں نے سائمن کاٹیچ کے ساتھ مل کر آسٹریلیا کے سکور میں ایک سو سترہ رنز کا اضافہ کیا۔

اس مرحلے پر ایسا دکھائی دے رہا تھا کہ آسٹریلیا کی ٹیم فالو آن سے بچنے میں کامیاب ہو جائے گی۔

لیکن جیسے ہی سائمن کاٹیچ آؤٹ ہوئے، انیل کمبلے کھیل پر دوبارہ چھا گئے اور انہوں نے چار سو چوہتر کے مجموعی سکور پر پوری آسٹریلوی ٹیم کو آؤٹ کر دیا۔

اس سے قبل بھارت نے اپنی پہلی اننگرز میں 705 رنز سات کھلاڑی آؤٹ پر اننگز ڈیکلیئر کر دی تھی۔

سچن تندولکر 241 پر ناٹ آؤٹ رہے۔ یہ ان کا انفرادی اور ملک سے باہر کسی بھی بھارتی کھلاڑی کا بہترین سکور ہے۔

تاہم کسی بھارتی کھلاڑی کا سب سے زیادہ سکور 281 رنز ہے جو لکشمن نے بھارت میں آسٹریلیا ہی کے خلاف بنائے تھے۔