یہ صفحہ دوست کو ای میل کیجیئے		پرِنٹ کریں

بھارت کی اس شکست کے بعد سیریز برابر ہو گئی ہے

آسٹریلیا کی کرکٹ ٹیم نے ملبورن میں بھارت کے خلاف تیسرے ٹیسٹ میں نو وکٹ سے کامیابی حاصل کر کے موجودہ سیریز کو برابر کر دیا ہے۔

میچ کے پانچویں دن جب کھیل شروع ہوا تو آسٹریلیا کو کامیابی حاصل کرنے کے لیے صرف پچانوے رن بنانا تھے۔ آسٹریلیا کی ٹیم نے یہ ہدف ایک وکٹ کے نقصان پرحاصل کر لیا۔

آسٹریلیا کے بلے بازوں نے یہ ہدف بائیس اوور میں حاصل کیا جس میں رکی پونٹنگ اور میتھیو ہیڈن کی اٹھاسی رن کی شراکت شامل تھی۔

ہیڈن نے تریپن رن بنائے جبکہ پونٹنگ نےجنہوں نے پہلی اننگز میں ڈبل سنچری بنائی تھی تینتیس رن بنائے اور آوٹ نہیں ہوئے۔

بھارت کی طرف سے واحد وکٹ اجیت اگرکر نے حاصل کی جب انہوں نے لینگر کو ایل بی ڈیلیو آوٹ کر دیا۔

آسٹریلیا کے بلے باز ہیڈن نے نو چوکوں کی مدد سے صرف باسٹھ بالوں پر اپنی نصف سنچری مکمل کی۔

بھارت اور آسٹریلیا کے درمیان چوتھا اور آخری ٹیسٹ دو جنوری سے سڈنی میں کھیلا جائے گا اور یہ میچ آسٹریلیا کے مشہور کھلاڑی اور کپتان اسٹیو وا کا آخری میچ ہوگا۔