معروف اطالوی فٹبالر مالڈینی نہیں رہے

اٹلی کی فٹبال ٹیم کے سابق کوچ اور اے سی میلان کے ڈیفینڈر چیزارے مالڈینی کا 84 سال کی عمر میں انتقال ہو گيا ہے۔

اے سی میلان نے ٹویٹ کیا: ’الوداع پیارے چیزارے۔ آج دنیا نے ایک عظیم انسان کو کھو دیا اور ہم نے اپنی تاریخ کے ایک صفحے کو گنوا دیا۔‘

ایک کھلاڑی کے طور پر مالڈینی نے اے سی میلان کے ساتھ اے سیریز کے چار ٹائٹل حاصل کیے۔ اس کے علاوہ انھوں نے سنہ 1963 میں اپنا پہلا یوروپین کپ بھی حاصل کیا تھا۔

اس کے بعد انھوں نے سنہ 1972 سے 1974 کے درمیان کلب کے مینیجر کی حیثیت سے خدمات انجام دیں۔

سنہ 1996 میں وہ اٹلی کو قومی ٹیم کے کوچ مقرر ہوئے جبکہ ان کے بیٹے پاؤلو مالڈینی ٹیم کے کپتان تھے۔

اس کے بعد انھوں نے یوروگوئے کی ٹیم کو سنہ 2002 کے ورلڈ کپ میں اپنی خدمات فراہم کیں۔

انھوں نے فٹبال کھیلنے کا اپنا سارا کریئر اٹلی میں ہی گزارا اور انھیں اے سی میلان کے ایک ستون کے طور پر دیکھا جاتا ہے۔

اٹلی کے ایک دوسرے ڈیفینڈر فرینکو باریزی نے کہا: ’سب سے زیادہ وہ ایک اچھے انسان تھے اور اب وہ ہمارے ساتھ نہیں۔‘