ناگ پور ٹیسٹ میں ایشون کی تباہ کن بولنگ، بھارت فاتح
،تصویر کا ذریعہAP
ناگ پور میں کھیلے جانے والے تیسرے کرکٹ ٹیسٹ میچ میں بھارت نے جنوبی افریقہ کو 124 رنز سے شکست دے دی ہے۔
اس فتح کے نتیجے میں بھارت کو چار ٹیسٹ میچوں کی سیریز میں دو، صفر کی ناقابل شکست برتری حاصل ہو گئی ہے۔
ناگ پور کی پچ سپن بولروں کے لیے انتہائی مددگار ثابت ہوئی اور میچ کی چاروں اننگز تین دنوں میں ہی ختم ہوگئیں۔
بھارت کی جانب سے 310 رنز کے ہدف کے جواب میں جنوبی افریقہ کی پوری ٹیم دوسری اننگز میں 185 رنز بنا کر آؤٹ ہوگئی۔
<link type="page"><caption> میچ کا تفصیلی سکور کارڈ</caption><url href="" platform="highweb"/></link>
دوسری اننگز میں جنوبی افریقہ کے لیے سب سے زیادہ سکور ہاشم آملہ اور فاف ڈوپلیسی نے کیا اور یہ دونوں 39 رنز کی اننگز کھیل کر آؤٹ ہوئے۔
بھارت کی جانب سے آف سپنر ایشون نے دوسری اننگز میں سات جنوبی افریقی بلے بازوں کو آؤٹ کیا۔ اس طرح ایشون میچ میں مجموعی طور پر 12 وکٹیں حاصل کر کے میچ کے بہترین کھلاڑی قرار پائے۔
جنوبی افریقہ کی جانب سےڈین ایلگر اور سٹین وین نے دوسری اننگز کا آغاز کیا تھا۔
پہلی اننگز کی طرح جنوبی افریقہ کی دوسری اننگز کا آغاز بھی اچھا نہ تھا اور 17 رنز کے مجموعی سکور پر سٹین وین پانچ رنز بنا کر پویلین لوٹ گئے۔
29 رنز کے مجموعی سکور پر جنوبی افریقہ کی دوسری وکٹ اس وقت گری جب عمران طاہر آٹھ رنز بنا کر آؤٹ ہوئے۔
،تصویر کا ذریعہAP
جمعرات کو کھیل کے دوسرے روز بھی پہلے دن کی طرح بولر چھائے رہے اور جہاں پہلے جنوبی افریقہ کی ٹیم اپنی پہلی اننگز میں صرف 79 رنز بنا کر آؤٹ ہوئی وہیں بھارت کی پوری ٹیم بھی دوسری اننگز میں 173 رنز ہی بنا سکی۔
بھارت کی جانب سے دوسری اننگز میں شیکھر دھون 39 رنز کے ساتھ ٹاپ سکور رہے جبکہ پجارا نے 31 رنز کی اننگز کھیلی۔
جنوبی افریقہ کے سپنر عمران طاہر نے پانچ جبکہ مورنے مورکل نے تین کھلاڑیوں کو آؤٹ کیا۔
اس سے قبل جنوبی افریقہ کے بیٹسمین پہلی اننگز میں بھارتی سپنرز کا مقابلہ کرنے میں ناکام رہے اور اس کے آٹھ کھلاڑیوں کا سکور دوہرے ہندسے تک نہ پہنچ سکا۔
جنوبی افریقہ کے لیے سب سے زیادہ 35 رنز جے پی ڈومینی نے بنائے جبکہ ہیمر نے 13 رنز سکور کیے۔
بھارت کی جانب روی چندرن ایشون نے پانچ جبکہ جڈیجا نے چار کھلاڑیوں کو آؤٹ کیا۔
اس سے پہلے بھارت کی پوری ٹیم اپنی پہلی اننگز میں 215 رنز بنا کر آؤٹ ہو گئی تھی۔
