لیڈز ٹیسٹ میں نیوزی لینڈ فاتح، سیریز برابر

لیڈز میں کھیلے جانے والے دوسرے ٹیسٹ میں نیوزی لینڈ نے انگلینڈ کو 199 رنز سے شکست دے کر سیریز برابر کر دی ہے۔

انگلینڈ کی پوری ٹیم دوسری اننگز میں 255 رنز بنا کر پویلین لوٹ گئی۔

انگلینڈ کی جانب سے دوسری اننگز میں جوز بٹلر نے 73 اور ایلسٹر کک نے 56 رنز بنائے۔

<link type="page"><caption> میچ کا تفصیلی سکور کارڈ</caption><url href="http://www.bbc.co.uk/sport/cricket/scorecard/89454" platform="highweb"/></link>

ان دونوں بیٹسمینوں کے علاوہ انگلینڈ کے دیگر کھلاڑی یکے بعد دیگر آؤٹ ہوتے گئے۔

انگلینڈ کی جانب سے ایڈم لیتھ اور ایلسٹر کک نے پانچویں دن کے کھیل کا آغاز کیا۔

دوسری اننگز میں انگلینڈ کا آغاز اچھا نہ تھا اور صرف 62 رنز کے مجموعی سکور پر اس کے چار ابتدائی بیسٹمین پویلین لوٹ گئے۔

نیوزی لینڈ کی جانب سے دوسری اننگز میں ٹرینٹ بولٹ اور مارک گریگ نے دو دو جبکہ کین ویلم سن نے ایک کھلاڑی کو آؤٹ کیا۔

اس سے پہلے لیڈز ٹیسٹ میچ کے چوتھے روز نیوزی لینڈ نے اپنی دوسری اننگز کا دوبارہ آغاز کیا اور 452 رنز آٹھ کھلاڑی آؤٹ پر اننگز ڈکلیئر کر دی تھی۔

نیوزی لینڈ کی جانب سے دوسری اننگز میں بی جے واٹلنگ نے 120 جبکہ مارٹن گپٹل نے 70 رنز بنائے۔

انگلینڈ کی جانب سے مارک وڈ نے تین جبکہ جیمز اینڈرسن اور سٹورٹ براڈ نے دو دو کھلاڑیوں کو آؤٹ کیا۔

اس سے قبل انگلینڈ کی پوری ٹیم نیوزی لینڈ کی پہلی اننگز میں 350 رنز کے جواب میں 350 رنز بنا کر ہی آؤٹ ہو گئی تھی۔

جمعے کو شروع ہونے والے اس میچ میں انگلینڈ نے ٹاس جیت کر نیوزی لینڈ کو پہلے بیٹنگ کرنے کی دعوت دی تھی۔