صحافی نجم سیٹھی نے آئی سی سی کا صدر بننے سے معذرت کر لی

نجم سیٹھی نے کرکٹ کی عالمی تنظیم انٹرنیشنل کرکٹ کونسل ( آئی سی سی ) کی صدارت سے دستبردار ہونے کا فیصلہ کرلیا ہے۔

انھوں نے یکم جولائی کو آئی سی سی کے صدر کا عہدہ سنبھالنا تھا۔

انھوں نے اپنے فیصلے سے فوری طور پر آئی سی سی کے چیئرمین سری نواسن اور پاکستان کرکٹ بورڈ کے چیئرمین شہریارخان کو آگاہ کردیا ہے۔

پاکستان کرکٹ بورڈ ان کی جگہ اب کسی سابق ٹیسٹ کرکٹر کو صدر کے عہدے کے لیے نامزد کرے گا۔

ٹاک شو یا آئی سی سی کی صدارت

نجم سیٹھی نے بی بی سی کو دیے گئے انٹرویو میں کہا کہ وہ چاہتے ہیں کہ ’آئی سی سی میں کوئی سابق ٹیسٹ کرکٹر پاکستان کی نمائندگی کرے جیسا کہ آئی سی سی نے یہ فیصلہ کرلیا ہے کہ آئندہ سے اس کا صدر کوئی سابق کرکٹر ہوگا۔ انھوں نے سوچا کہ اگر وہ صدر بن گئے تو پھر کسی سابق کرکٹر کو دس سال بعد آئی سی سی کا صدر بننے کا موقع ملے گا لہذا انھوں نے بہتر یہی سمجھا کہ کسی سابق ٹیسٹ کرکٹر کو موقع ملنا چاہیے۔وہ کسی سابق ٹیسٹ کرکٹ کو یہ اعزاز دینا چاہتے ہیں۔‘

نجم سیٹھی نے اس تاثر کو غلط قرار دیا کہ انھوں نے آئی سی سی کی صدارت اس لیے چھوڑی ہے کہ وہ جیو ٹی وی پر باقاعدگی سے پروگرام کرتے ہیں اور یہ چیز ان کے صدر بننے میں رکاوٹ ہوسکتی تھی۔

نجم سیٹھی نے کہا کہ آئی سی سی نے ان کے ٹی وی پر پروگرام کرنے پر کبھی بھی اعتراض نہیں کیا ہے۔

دوسری جانب بی بی سی کو پاکستان کرکٹ بورڈ کے ذرائع سے معلوم ہوا ہے کہ آئی سی سی نے گزشتہ سال اگست میں جب پاکستان کرکٹ بورڈ کو آئی سی سی کی صدارت کے بارے میں پیش کش کا خط تحریر کیا تھا تو اسی وقت اس نے پاکستان کرکٹ بورڈ کو یہ کہا تھا وہ چاہے تو کسی ایسے کرکٹر کو صدر کے عہدے کے لیے نامزد کرسکتا ہے جس کی ساکھ اور شہرت اچھی ہو اور جو پاکستان اور آئی سی سی دونوں کےلیے مثبت کام کرسکے تاہم اس وقت پاکستان کرکٹ بورڈ نے کسی کرکٹر کے بجائے نجم سیٹھی کی نامزدگی کی تھی۔

دو عہدے ممنوع

واضح رہے کہ نجم سیٹھی اس وقت پاکستان کرکٹ بورڈ کی ایگزیکٹیو کمیٹی کے چیئرمین ہیں اور آئی سی سی کے قوانین کے تحت وہ دو عہدے ایک ساتھ نہیں رکھ سکتے۔ آئی سی سی ماضی میں بھی پاکستان کرکٹ بورڈ پر یہ واضح کرچکی ہے کہ اگر نجم سیٹھی آئی سی سی کا صدر بنتے ہیں تو انھیں پاکستان کرکٹ بورڈ کا عہدہ چھوڑنا ہوگا۔

نجم سیٹھی کی دستبرداری کے بعد اب آئی سی سی پاکستان کرکٹ بورڈ کو نئی نامزدگی کے بارے میں لکھے گی اور پاکستان کرکٹ بورڈ اپنے طریقہ کار کے تحت کسی سابق کرکٹر کو نامزد کرکے اس کا نام آئی سی سی کی نومینیشن کمیٹی کے پاس بھیجے گا جو اس کی منظوری دے گی۔

آئی سی سی کے 22 سے 27 جون تک باربیڈوس میں ہونے والے اجلاس میں نئے صدر کی توثیق ہوگی اور وہ یکم جولائی سے اپنا عہدہ سنبھالے گا۔

نجم سیٹھی کے دستبردار ہونے کے بعد خیال ظاہر کیا جا رہا ہے کہ پاکستان کرکٹ بورڈ سابق ٹیسٹ کرکٹر ماجد خان کو اس عہدے کے لیے نامزد کرے گا۔