دبئی: نیوزی لینڈ کے خلاف پہلے میچ میں پاکستان فاتح

دبئی میں پاکستان کی ٹیم نے نوجوان کھلاڑی حارث سہیل کی محتاط اور پراعتماد بیٹنگ کی بدولت نیوزی لینڈ کو شکست دے دی ہے۔

پاکستان کی ٹیم کو میچ میں کامیابی حاصل کرنے کے لیے 247 کا ہدف ملا تھا۔

پاکستان کی اننگز کا آغاز اچھا نہ تھا اور اس کے تمام سینئر اور تجربہ کار بلے باز، یونس خان، مصباح الحق، محمد حفیظ اور اسد شفیق جلد آؤٹ ہو گئےاور پاکستان کی اننگز بکھتر ہوئی نظر آئی۔ ایسے میں حارث سہیل نے ایک اینڈ پر اننگز کو سنبھالے رکھا۔ دوسری طرف شاہد آفریدی کا بلا آج چل گیا جس نے پاکستان کو فتح سے ہمکنار کر دیا۔

اس سے قبل پاکستان کی چھٹی وکٹ 126 رنز کے مجموعی سکور پر گر گئی تھی جب سرفراز احمد 26 رنز بنا کر آؤٹ ہوئے تھے۔ اسوقت میچ پاکستان کے ہاتھ سے نکلتا دکھائی دے رہا تھا۔

پاکستان کو پانچواں نقصان اس وقت اٹھانا پڑا جب 86 رنز کے مجموعی سکور پر کپتان مصباح الحق 13 رنز بنا کر پویلین لوٹ گئے۔

پاکستان کی چوتھی وکٹ 40 رنز کے مجموعی سکور پر گری جب احمد شہزاد 28 رنز بنا کر آؤٹ ہوئے۔

<link type="page"><caption> میچ کا تفصیلی سکور کارڈ</caption><url href="http://www.bbc.com/sport/cricket/scorecard/89440" platform="highweb"/></link>

پاکستان کی جانب سے محمد حفیظ اور احمد شہزاد نے اننگز کا آغاز کیا۔

پاکستان کا آغاز اچھا نہ تھا اور صرف 13 رنز کے مجموعی سکور پر محمد حفیظ صرف چھ رنز بنا کر پویلین لوٹ گئے۔

نیوزی لینڈ کی جانب سے کائل ملز، ویٹوری اور نیشم نے ایک ایک کھلاڑی کو پویلین کی راہ دکھائی۔

اس سے قبل نیوزی لینڈ نے راس ٹیلر کی عمدہ بلے بازی کی بدولت پاکستان کو فتح کے لیے 247 رنز کا ہدف فراہم کیا تھا۔

پیر کی شام پاکستانی ٹیم کے کپتان مصباح الحق نے ٹاس جیت کر نیوزی لینڈ کو بیٹنگ کی دعوت دی تو مہمان ٹیم نے مقررہ 50 اوورز میں سات وکٹوں کے نقصان پر 246 رنز بنائے۔

نیوزی لینڈ کی اننگز کی خاص بات راس ٹیلر کی عمدہ سنچری تھی۔ انھوں نے ایک روزہ کرکٹ میں اپنی 11ویں سنچری آٹھ چوکوں اور ایک چھکے کی مدد سے مکمل کی۔

نیوزی لینڈ کی جانب سے ٹیلر کے علاوہ کوئی بھی بلے باز جم کر نہ کھیل سکا اور وقفے وقفے سے وکٹیں گرنے کا سلسلہ جاری رہا۔

اوپنرز ڈین گریم براؤن لی اور اینٹون ڈیوسچ کی شراکت چھٹے اوور میں اس وقت ختم ہوئی جب احمد شہزاد نے محمد عرفان کی گیند پر براؤنلی کو کیچ کر لیا۔

محمد عرفان نے ہی دسویں اوور میں کین ولیمسن کو وکٹوں کے پیچھے کیچ کروا کر پاکستان کو دوسری کامیابی دلوائی۔

اینٹون ڈیوسچ آؤٹ ہونے والے تیسرے بلے باز تھے جنھیں ایک وقفے کے بعد دوبارہ پاکستانی ٹیم میں شامل ہونے والے وہاب ریاض نے آؤٹ کیا۔

پاکستان کو چوتھی کامیابی 25ویں اوور میں ملی جب لیتھم 13 رنز بنانے کے بعد رن آؤٹ ہوگئے۔

29ویں اوور میں امپائر علیم ڈار کے نیشم کو ناٹ آؤٹ دینے پر لیے گئے ریویو کا نتیجہ پاکستان کے حق میں آیا اور یوں شاہد آفریدی نے پاکستان کو پانچویں کامیابی دلوائی۔

محمد عرفان نے رونچی کو یونس خان کے ہاتھوں کیچ کروا کر انفرادی طور پر تیسری اور ٹیم کے لیے چھٹی وکٹ لی۔

وہاب ریاض نے 46ویں اوور میں لگاتار دو چوکے کھانے کے بعد ڈینیئل ویٹوری کو بولڈ کر کے پاکستان کو ساتویں کامیابی دلوائی۔ یہ اس میچ میں وہاب کی دوسری وکٹ تھی۔

پاکستان اور نیوزی لینڈ کے درمیان ایک روزہ سیریز میں پانچ میچ کھیلے جائیں گے۔

اس سے قبل دونوں ٹیموں کے درمیان کھیلی جانے والی ٹیسٹ اور ٹی ٹوئنٹی سیریز برابر رہی تھی۔