بولرز کے لیے کرکٹ پہلے سے مشکل: سعید اجمل

پاکستان کی کرکٹ ٹیم کے سپنر سعید اجمل کا کہنا ہے کہ ون ڈے اور ٹی ٹوئنٹی کرکٹ میں بولرز بڑھتی ہوئی مشکلات سے دوچار ہیں۔

36 سالہ سعید اجمل نے برطانوی خبر رساں ادارے روئٹرز سے بات کرتے ہوئے کہا کہ ٹی ٹوئنٹی کرکٹ کے نئے قوانین کی وجہ سے بولرز کو مسلسل بدلتی ہوئی صورتحال کا سامنا رہتا ہے۔

’وقت اب بہت بدل گیا ہے اور بولرز کی اب وہ عزت نہیں رہی جو پہلے ہوتی تھی۔ کرکٹ بہت تیز کھیل ہوگیا ہے اور بلے باز کا رویہ بھی جارحانہ ہوگیا ہے جس کی وجہ سے بولرز کو ہر وقت دباؤ کا سامنا رہتا ہے ۔‘

ٹی ٹوئنٹی کے بین الاقوامی مقابلوں میں سب سے زیادہ وکٹیں لینے سعید اجمل کے مطابق بلے باز اب ایسی ایسے شاٹس کھیل رہے ہیں جو کچھ عرصہ قبل ناقابلِ تصور تھیں ۔

’بیٹسمین اب ون ڈے اور ٹی ٹوئنٹی میں میچ کی شروعات میں ہی جارحانہ رویہ اختیار کر لیتے ہیں، جس کی وجہ سے بولرز کو ہر میچ میں کچھ نیا سوچ کر آنا پڑتا ہے۔‘

33 ٹیسٹ میچ کھیل کر 169 وکٹیں، 110 ون ڈے میچوں میں 182 وکٹیں لینے والے اجمل کا کہنا ہے کہ اب ٹیموں کے لیے ون ڈے اور ٹی ٹوئنٹی میچ کے آخری 10 اورز میں 100 رنز سکور کرنا معمول کی بات ہے۔

’ٹی ٹوئنٹی کرکٹ بنی ہی بیٹسمینوں کے لیے ہے جبکہ ون ڈے میں پانچ فیلڈرز کو دائرے کے اندر رکھنے کے قانون نے بولرز پر پریشر اور بھی بڑھا دیا ہے۔‘

اجمل اِنگلینڈ میں ورسٹرشائر کاؤنٹی کی طرف سے جولائی تک کھیلیں گے جس کے بعد وہ وطن واپس آ کر سری لنکا کے دورے کی تیاری کریں گے۔