ایشیا کپ، ورلڈ ٹی ٹوئنٹی کے لیے پاکستانی ٹیم کا اعلان

ایشیا کپ اور ورلڈ ٹی ٹوئنٹی کے لیے پاکستانی کرکٹ ٹیموں کا اعلان کر دیا گیا ہے۔ بائیں ہاتھ سے بیٹنگ کرنے والے فواد عالم تین سال بعد دوبارہ ون ڈے ٹیم میں جگہ بنانے میں کامیاب ہوگئے ہیں۔

ان کے علاوہ وکٹ کیپر کامران اکمل کی بھی ٹی ٹوئنٹی ٹیم میں واپسی ہوئی ہے۔

خیال رہے کہ ایشیا کپ اور ورلڈ ٹی ٹوئنٹی دونوں مقابلے بنگلہ دیش میں ہو رہے ہیں۔

25 فروری سے شروع ہونے والے ایشیا کپ میں مصباح الحق اور 16 مارچ سے شروع ہونے والے ورلڈ ٹی ٹوئنٹی میں محمد حفیظ قیادت کریں گے۔

فواد عالم کی ٹیم میں واپسی کی وجہ اس سال ان کی عمدہ کارکردگی ہے جس میں انھوں نے ایک روزہ پریزیڈنٹ کپ میں دو سنچریوں اور دو نصف سنچریوں کی مدد سے 438 رنز اور فرسٹ کلاس میچوں میں بھی دو سنچریوں اور چار نصف سنچریوں کی مدد سے 658 رنز بنائے ہیں۔

کامران اکمل نے آخری بار پاکستان کی نمائندگی جون سنہ 2013 میں چیمپئنز ٹرافی میں کی تھی جب کہ اسی سال مارچ میں انھوں نے جنوبی افریقہ کے خلاف ٹی ٹوئنٹی میچ کھیلا تھا۔

کامران اکمل نے اس سال ایک روزہ کپ میں ایک سنچری اور ایک نصف سنچری سکور کی ہے۔

ون ڈے ٹیم ان کھلاڑیوں پر مشتمل ہے: مصباح الحق (کپتان)، شرجیل خان، احمد شہزاد، محمد حفیظ، عمراکمل، صہیب مقصود، شاہد آفریدی، فواد عالم، عمرگل، جنید خان، سعید اجمل، عبدالرحمCن، انور علی، بلاول بھٹی اور محمد طلحہ۔

ٹی ٹوئنٹی ٹیم میں یہ کھلاڑی شامل ہیں: محمد حفیظ (کپتان)، شرجیل خان، احمد شہزاد، کامران اکمل، عمراکمل، صہیب مقصود، شاہد آفریدی، عمرگل، جنید خان، شعیب ملک، بلاول بھٹی، سعید اجمل، سہیل تنویر، محمد طلحہ اور ذوالفقار بابر۔