ٹیم بنگلہ دیش جائے یا نہ جائے، فیصلہ وزیرِ اعظم کا

اس ماہ بنگلہ دیش میں ہونے والے ایشیا کپ میں پاکستانی کرکٹ ٹیم کی شرکت کا فیصلہ وزیراعظم میاں محمد نواز شریف کریں گے۔

پاکستان کرکٹ بورڈ کے چیرمین ذکا اشرف نے منگل کے روز وزیرِ اعظم کے مشیر برائے خارجہ امور سرتاج عزیز سے اسلام آباد میں ملاقات کی جس میں انہوں نے بنگلہ دیش کی صورتحال اور ایشیا کپ میں پاکستانی ٹیم کی شرکت سے متعلق بات چیت کی۔

ذکا اشرف نے بی بی سی کو بتایا کہ وزارت خارجہ نے اس بارے میں سمری وزیراعظم کو بھیج دی ہے جو پاکستان کرکٹ بورڈ کے سرپرستِ اعلیٰ ہیں اور وہ اس کی منظوری دیں گے جس سے پاکستان کرکٹ بورڈ کو آگاہ کر دیا جائے گا۔

ایشیا کپ 25 فروری سے آٹھ مارچ تک ڈھاکہ میں کھیلا جائے گا۔

واضح رہے کہ بنگلہ دیش میں حالیہ انتخابات کے موقع پر تشدد کے واقعات ہوئے تھے۔ اس کے علاوہ جماعت اسلامی کے رہنما عبدالقادر ُملا کو سزائے موت سنائے جانے پر پاکستان کی قومی اسمبلی میں مذمتی قرارداد اور ملک گیر احتجاج پر بنگلہ دیشی حکومت نے سخت ردعمل ظاہر کیا تھا اور بنگلہ دیش میں پاکستان کے خلاف مظاہرے بھی ہوئے تھے۔ اس کے بعد پاکستان کرکٹ بورڈ نے اپنی ٹیم ڈھاکہ بھیجنے کو حکومت کی اجازت سے مشروط کر دیا تھا۔

یاد رہے کہ ایشین کرکٹ کونسل کے چیف ایگزیکیٹیو اشرف الحق نے اپنے ایک اخباری انٹرویو میں دعویٰ کیا تھا کہ پاکستان کرکٹ بورڈ نے آئی سی سی کے اجلاس میں سکیورٹی کے بارے میں کسی قسم کے تحفظات ظاہر نہیں کیے تھے تاہم پاکستان کرکٹ بورڈ کے اس وقت کے نگراں چیئرمین نجم سیٹھی نے ان کے اس دعوے کو مسترد کر دیا تھا۔

نجم سیٹھی کا کہنا تھا کہ پاکستان کرکٹ بورڈ کے چیف آپریٹنگ آفیسر سبحان احمد نے اجلاس میں سکیورٹی کے معاملات پر تحفظات ظاہر کیے تھے۔

قابل ذکر بات یہ ہے کہ ایشیا کپ کے بعد مارچ اور اپریل میں بنگلہ دیش آئی سی سی ورلڈ ٹی ٹوئنٹی کی میزبانی بھی کرے گا۔