آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
الیکٹرانک آرٹس کا آخری فیفا ایڈیشن جو غلطی سے تقریباً مفت ہی بِک گیا
- مصنف, لیو میکموہن
- عہدہ, ٹیکنالوجی ٹیم
60 روپے کی چیز صرف چھ پیسے میں مل جائے، ایسا کم ہی ہوتا ہے۔
لیکن ویڈیو گیمز شائقین کو حال ہی میں ایک ایسا سنہری موقع اس وقت ملا جب الیکٹرانکس آرٹس (ای اے) کی ایک نئی ویڈیو گیم کی قیمت تقریبا 99 فیصد کم رکھ دی گئی۔ اس غلطی کی وجہ صرف ایک ہندسہ تھا جس نے 60 ڈالر کی ویڈیو گیم کو چھ سینٹس کا کر دیا۔
ای اے کمپنی کو اپنی اس غلطی کا احساس ہو گیا ہے جس نے فیفا 23 الٹی میٹ ایڈیشن کو انڈیا ایپک گیمز سٹور پر 4800 انڈین روپے کی بجائے صرف چار روپے 80 پیسے قیمت میں ظاہر کیا۔
لیکن اس سے پہلے ہی کئی گیم شائقین آن لائن آرڈر کر چکے تھے۔ ان کے لیے اچھی خبر یہ ہے کہ اب کمپنی نے اعلان کیا ہے کہ وہ ان صارفین کو اسی قیمت پر گیم دے گی جس پر انھوں نے آرڈر کیا تھا یعنی تقریبا 99 فیصد کم قیمت پر۔
اہم بات یہ ہے کہ یہ ویڈیو گیم ای اے سپورٹس کی سب سے زیادہ فروخت ہونے والی فٹ بال سیریز کی آخری ویڈیو گیم ہو گی کیونکہ وہ رواں سال کے آغاز میں اعلان کر چکے ہیں کہ اب وہ فیفا برانڈ کی گیمز نہیں بنائیں گے۔
ای اے سپورٹس ویڈیو کا کہنا ہے کہ اب سے ان کی فٹ بال ویڈیو گیمز ’ای اے سپورٹس ایف سی‘ کے نام سے مارکیٹ میں آئیں گی۔
مئی میں ہونے والے اس اعلان کے ساتھ ہی ای اے سپورٹس اور فیفا کے درمیان 29 سالہ اشتراک اختتام پذیر ہوا جس کی ایک وجہ لائسنس فیس بتائی جا رہی ہے۔ دوسری جانب فیفا نے کہا ہے کہ وہ اب اپنی ویڈیو گیمز جاری کریں گے۔
لیکن اس تازہ ترین ویڈیو گیم کا چرچہ کافی وقت سے ہو رہا تھا جس کی ایک وجہ اس میں خواتین ٹیموں کی شمولیت بتائی جاتی ہے۔
End of سب سے زیادہ پڑھی جانے والی
یہ بھی پڑھیے
ایک ہندسے کی غلطی
فیفا الٹی میٹ ایڈیشن ویڈیو گیمز عام طور پر دیگر گیمز سے زیادہ مہنگی ہوتی ہیں کیونکہ ان میں ایکسٹرا فیچرز ہوتے ہیں جیسا کہ کھلاڑیوں کی خرید و فروخت کی جا سکتی ہے، فیفا کے ایکسٹرا پوائنٹس ملتے ہیں اور باضابطہ ریلیز سے قبل ہی ویڈیو گیم تک رسائی مل جاتی ہے۔
انڈیا میں اس نئے ایڈیشن کی اصلی قیمت 4800 روپے یا 60 امریکی ڈالر تھی جب کہ اسی گیم کا سٹینڈرڈ ایڈیشن 44 امریکی ڈالر کا تھا۔
لیکن اس غلطی کی خبر جنگل میں آگ کی طرح پھیلی اور سوشل میڈیا پر گیم کے فینز نے دنیا بھر میں اسے پھیلا دیا کہ ایپک گیمز انڈیا سٹور پر اسے صرف پانچ سے چھ سینٹس میں خریدا جا سکتا ہے۔
کمپنی کو غلطی کا احساس جلد ہی ہو گیا تھا لیکن اس سے قبل ہی کئی خوش قسمت شائقین اس کا فائدہ اٹھا چکے تھے۔
ایک صارف نے خوشی سے بتایا کہ وہ 25 روپے میں پانچ گیمز خرید چکے ہیں۔
رواں ہفتے ای اے سپورٹس اور ایپک گیمز کی جانب سے خریداروں کو ای میل کے ذریعے آگاہ کیا گیا کہ ان کو اسی قیمت پر گیم مہیا کی جائے گی۔
ای اے سپورٹس کی فیفا ٹیم نے تسلیم کیا ہے کہ ایسا ان کی اپنی غلطی کی وجہ سے ہوا۔
واضح رہے کہ فیفا 22 اب تک کا سب سے کامیاب ایڈیشن ثابت ہوا تھا اور اس کے باضابطہ ریلیز کے کچھ ہی دیر بعد ای اے سپورٹس نے بتایا تھا کہ دنیا بھر سے 91 لاکھ کھلاڑی اس کا حصہ بنے اور پہلے ہی ہفتے میں تقریبا 460 ملین میچ کھیلے جا چکے تھے۔
