گیلی پچ سُکھانے کے انوکھے طریقے

وردہ نامی سمندری طوفان کی زد میں آنے والے انڈین شہر چنئی میں انڈیا اور انگلینڈ کے مابین کرکٹ ٹیسٹ میچ کی تیاریوں کا سلسلہ جاری ہے۔

سٹیڈیم میں پچ خشک کرنے کے اقدامات کی ایک تصویر وائرل ہوئی ہے جس میں کوئلے کے الاؤ کی حدت سے پچ کی نمی دور کرنے کی کوشش کی جا رہی ہے۔ آج کے مشینی دور میں یہ طریقہ کچھ پرانا لگے، لیکن یہ کارآمد ہے۔

گیلی پچ سکھانے کے لیے بہت سے طریقے استعمال کیے جاتے ہیں جن میں جدید مشینری سے مدد لینے سے لے کر پچ پر الاؤ جلانا اور اس کے قریب آگ لگانا شامل ہیں۔

کوئلے سے پچ کی سکائی

پچ زیادہ گیلی ہو یا اس پر نمی ہو تو کوئلے کا الاؤ خاصا کام آتا ہے۔

برصغیر میں یہ طریقہ کافی استعمال ہوتا ہے۔ اس میں ایک تسلے میں گرم کوئلے ڈال کر پچ پر رکھے جاتے ہیں یا پھر انھیں کسی جالي دار ہولڈر میں پچ پر رکھ دیا جاتا ہے۔ پچ کا ایک حصہ خشک ہونے کے بعد الاؤ کو دوسرے حصوں پر رکھا جاتا ہے۔

آگ لگاؤ، پچ سكھاؤ

سننے میں چاہے یہ عجیب لگے، لیکن پچ کو خشک کرنے کے لیے اس گیلے حصوں یا پچ کے ارد گرد آگ لگانے کا طریقہ بھی استعمال ہوتا ہے۔

بھارت کے علاوہ ویسٹ انڈیز میں آگ سے پچ خشک کرنے کا طریقہ کئی بار استعمال کیا جا چکا ہے۔

ضرورت کے مطابق پچ خشک ہونے پر آگ بجھا دی جاتی ہے، تاکہ مٹی زیادہ سخت نہ ہو پائے۔

استری کا کمال

آپ یہ جان کر حیران رہ جائیں گے کہ استری بھی کرکٹ پچ خشک کرنے کے کام آ سکتی ہے۔

چنئی میں بارش اکثر خلل ڈالتی رہی ہے، ایسے میں سنہ 2005 میں اسی میدان کی پچ استری سے سكھائي گئی تھی۔

یہ طریقہ اب چاہے کم نظر آئے، لیکن ایک وقت تھا کہ یہ کافی رائج تھا۔

ہیلی کاپٹر بنا مددگار

جب کبھی میچ سے پہلے تیز بارش ہو اور میدان اور پچ کو کافی نقصان پہنچے، تو اسے خشک کرنے کے لیے ہیلی کاپٹر کا استعمال بھی کیا جاتا ہے۔

ہیلی کاپٹر کے بڑے پروں کی مدد سے کم وقت میں پچ کو کھیلنے کے قابل بنایا جا سکتا ہے۔

ایئر پمپ کا کمال

پچ کا پانی یا نمی خشک کرنے کے لیے تیز ہوا کافی کام آ سکتی ہے اور ایسی صورت میں تیز دباؤ سے ہوا خارج کرنے والے پمپ کافی فائدہ مند ثابت ہوتے ہیں۔

برصغیر ہو یا آسٹریلیا اور انگلینڈ، یہ طریقہ کافی عام ہے۔

اس میں گراؤنڈ مین مشین کو اپنی کمر پر لاد کر تیز ہوا سے پچ کے الگ الگ حصے خشک کرنے والی کی کوشش کرتا ہے۔

ریت کی تہہ

میدان کہیں ہو، بارش ہر جگہ پہنچ جاتی ہے۔ ایسے میں میدان میں ہر وقت ریت تیار رکھی جاتی ہے۔ یہ ریتلی مٹی کئی بار پچ خشک کرنے کے لیے کافی کارگر ثابت ہوتی ہے۔

اس کے علاوہ میچ شروع ہونے کے بعد جب پچ پر پیر پھسلے تو یہی ریت پھر کام آتی ہے۔