ایشیئن چیمپیئز ٹرافی: انڈیا کی روایتی حریف پاکستان پر ایک گول سے فتح

ملائیشیا میں جاری ایشیائی چیمپیئنز ٹرافی ہاکی ٹورنامنٹ میں انڈیا نے روایتی حریف پاکستان کو دو کے مقابلے میں تین گول سے شکست دے دی ہے۔

اتوار کو کونتن میں کھیلے جانے والے میچ میں سنسنی خیز اور تیز کھیل دیکھنے کو ملا۔

اس میچ میں پہلے کوارٹر میں میچ بغیر کسی گول کے برابر تھا تاہم دوسرے کوارٹر کے آغاز میں ہی انڈیا نے پردیپ مور کے گول کی بدولت سبقت حاصل کر لی۔

تیسرے کوارٹر میں پاکستان نے پہلے محمد رضوان سینیئر کے گول کی بدولت مقابلہ برابر کیا اور چھ منٹ بعد محمد عرفان نے گول کر کے پاکستان کو برتری دلوا دی۔

اس موقع پر انڈین کھلاڑیوں نے دو منٹ میں دو گول کر کے نہ صرف برتری حاصل کی بلکہ میچ کو سنسنی خیز بنا دیا۔

انڈیا کی جانب سے دوسرا گول روپندر پال سنگھ نے پنلٹی کارنر پر کیا جس کے بعد رمن دیپ سنگھ نے ایک جوابی حملے میں گول کر اپنی ٹیم کو ایک بار پھر سبقت دلوا دی۔

یہ ٹورنامنٹ میں انڈیا کی دوسری فتح ہے اور وہ تاحال ان مقابلوں میں ناقابلِ شکست ہے۔

انڈیا نے اپنے پہلے میچ میں جاپان کو دو کے مقابلے میں دس گول سے شکست دی تھی جبکہ جنوبی کوریا سے اس کا میچ ایک ایک گول سے برابر رہا تھا۔

پاکستان نے بھی اس میچ سے قبل دو میچ کھیلے ہیں۔ اسے اپنے پہلے میچ میں ملائیشیا کے ہاتھوں دو کے مقابلے میں چار گول سے شکست ہوئی تھی تاہم اس نے دوسرے میچ میں جنوبی کوریا کو ایک صفر سے ہرایا تھا۔

ایشیائی چیمپیئنز ٹرافی مقابلے تین برس کے تعطل کے بعد کھیلے جا رہے ہیں۔

ماضی میں انڈیا 2011 اور 2013 میں یہ ٹورنامنٹ جیت چکا ہے جبکہ 2012 میں ٹورنامنٹ کا فاتح پاکستان رہا تھا۔