موٹاپے کے شکار لوگوں میں دل کے امراض ہونے کا خدشہ زیادہ ہوتا ہے

تحقیق کاروں کا کہنا ہے کہ موٹاپے کے شکار دل کے مریضوں کے علاج کے تین سال بعد مرنے کے امکانات عام وزن والے مریضوں کے مقابلے کم ہوتے ہیں۔

یہ تجربہ ایک ہزار چھ سو چھہتر مریضوں پر کیا گیا ہے ۔تاہم اس کی وجہ معلوم نہیں ہو سکی ہے۔

ساتھ ہی ماہرین نے یہ بھی خبردار کیا ہے کہ موٹاپے کے شکار لوگوں میں دل کے امراض ہونے کا خدشہ زیادہ ہوتا ہے۔

لیڈز کے ریسرچر ڈاکٹر ہائنز بیوٹنر کا کہنا ہے کہ ’اس میں کوئی شبہ نہیں کہ موٹاپے کے شکار لوگوں میں شوگر ، ہائیپر ٹینشن اور شریانیں بند ہونے کے امراض جلدی اور آسانی سے ہونے کا امکان ہوتا ہے لیکن ایک مرتبہ علاج ہونے کے بعد عام لوگوں کے مقابلے میں ان میں جلد صحتیاب ہونے کی صلاحیت زیادہ ہوتی ہے۔

تاہم ڈاکٹر بیوٹنر کے مطابق یہ بات واضح نہیں ہو سکی ہے کہ ایسا کیوں ہے۔

ان کا کہنا تھا کہ ممکن ہے کہ موٹاپے کی وجہ سے انسانی جسم کی کیمسٹری کا مختلف ہونا اس کی ایک وجہ ہو۔مثال کے طور پر موٹاپے کے سبب خون میں ایسے خلیوں کی مقدار کم ہوتی ہو جو خون کو گاڑھا کرتے ہیں اس کے علاوہ دل کے خلیوں میں چربی کی سطح بھی اس کی ایک وجہ ہو سکتی ہے۔

ایک خیال یہ بھی ہے کہ موٹے لوگوں میں ’انڈو جینیس کینابی نائڈز‘ کی مقدار زیادہ ہوتی ہے دل کا دورہ پڑنے پر یہ کیمیکلز دل کو محفوظ کرنے کا کام کرتے ہیں۔

ڈاکٹر بیوٹنر کا کہنا ہے کہ موٹاپہ کم کرنے کی ہر ممکن کوشش کرنی چاہیے کیونکہ وزن کم ہونے سے موٹاپے سے جڑی بیماریوں کا خطرہ کم ہو جاتا ہے۔

تحقیق کارو ں کا کہنا ہے کہ ایک بات طے ہے کہ اگر آپ کا وزن ضرورت سے زیادہ ہے تو ہائی بلڈ پریشر یا بلند فشارے خون ، امراض قلب ، اور شوگر ہونے کے امکانات بہت زیادہ ہوتے ہیں۔