یہ مثانہ تجربہ گاہ میں پروسس کیا گیا ہے

نارتھ کیرولائنا کی چیک فارسٹ یونیورسٹی میں ماہرین نے ایسے سات مریضوں میں مثانے ٹرانسپلانٹ کیئے ہیں اور ان میں سے کچھ افراد میں یہ ٹرانسپلانٹ کردہ عضو اگلے چند سالوں کے دوران بالکل صحیح کام کررہا ہے۔

یہ تحقیق امریکی جریدے دی لینسٹ میں شائع کی گئی ہے اور اسے ایک بڑی کامیابی قرار دیا جارہا ہے۔

اب ماہرین کی یہ ٹیم دیگر انسانی عضلات مثلاً دل وغیرہ کو بھی اسی طریقہ کار سے تجربہ گاہ میں پروسس کرکے ٹرانسپلانٹ کرنے پر کام کررہی ہے۔

مثانے کے امراض سے مثانے میں دباؤ بڑھ جاتا ہے جس کے نتیجے میں گردے کے مسائل پیدا ہوسکتے ہیں۔

عموماً ایسے مسائل کی صورت میں ایک خاص طرح کی سرجری کی جاتی ہے تاہم اس آپریشن کے اپنے نقصانات ہیں۔

ٹیم میں شامل ڈاکٹر اینتھونی اٹالہ کا کہنا ہے کہ انسانوں میں خراب ہوجانے والے ٹشو اور دیگر عضلات کی منتقلی کی راہ میں یہ پہلا قدم ہے۔

عام طور پر جو سرجری کی جاتی ہے اس میں مریض کے اپنے معدے یا آنت سے ٹشو لیئے جاتے ہیں جنہیں خراب شدہ ٹشو کی جگہ استعمال کیا جاتا ہے تاکہ مثانے کا نظام درست کیا جاسکے۔ اس طریقہ کار سے گردہ کے نظام کی خرابی سے بچا جاسکتا ہے تاہم کینسر سمیت دیگر کئی مسائل کا خدشہ بڑھ جاتا ہے۔

جن مریضوں میں جدید طریقے سے ٹرانسپلانٹ کیا گیا ہے انہیں کمزور مثانے کی شکایت تھی۔ ماہرین نے ہر مریض کے مثانے سے خلیوں کے نمونے لیئے اور پھر تجربہ گاہ میں انہیں پروان چڑھایا۔ جس کے بعد انہیں خراب ٹشوز سے تبدیل کردیا گیا۔

اس ٹرانسپلانٹ کے بعد پانچ سال تک مریضوں کے نظام کو زیر تجزیہ رکھا گیا ہے۔ ان میں سے کئی مریض تو بالکل صحتمند ہوچکے ہیں اور ان کے مثانے کا نظام مکمل طور پر صحیح کام کررہا ہے۔

اب سائنسدان اسی طریقے سے انسانی عضلات کے بیس مختلف ٹشو تجربہ گاہ میں پروان چڑھا رہے ہیں تاکہ دیگر امراض کا بھی اسی طرح کامیاب علاج ممکن ہوسکے۔