 |  شٹل طیاروں کی پروازیں عارضی طور پر معطل کر دی گئی ہیں |
امریکی خلائی ادارے ناسا نے اعلان کیا ہے کہ ڈسکوری خلائی طیارہ مزید ایک دن بین الاقوامی خلائی سٹیشن پر رہے گا تاکہ ڈسکوری کا عملہ وہاں کام مکمل کر سکے اور رسد کا سامان خلائی سٹیشن پر منتقل کر سکے۔ ڈسکوری کے خلائی سٹیشن پر قیام میں توسیع کا فیصلہ ناسا کے شٹل خلائی طیاروں کی پروازیں عارضی طور پر معطل کرنے کے اعلان کے بعد کیا گیا ہے۔ ناسا نے شٹل سروس معطل کرنے کا فیصلہ ڈسکوری کے فضا میں چھوڑے جانے کے وقت اس کے بیرونی حدت سے بچاؤ کے حصے ٹوٹ جانے کے واقعے کے بعد کیا تھا۔ اس سے قبل ڈسکوری کے دو خلابازوں نے سات گھنٹے تک خلا میں چہل قدمی کی اور شٹل کو مرمت کرنے کے لیے بنائی جانے والی تکنیک کا تجربہ کیا۔ شٹل مرمت کرنے کی تکنیک کولمبیا شٹل کو حادثہ پیش آنے کے بعد بنائی گئی ہیں۔ کولمیبا شٹل کے فضا میں پھٹ جانے سے اس پر سوار عملے کے ساتوں ارکان ہلاک ہوگئے تھے۔ مرمت کرنے کے تجربات ڈسکوری پر کیے گئے لیکن ڈسکوری کے جن ٹائلز کو نقصان پہنچا تھا ان کو تبدیل کرنے کے لیے اضافی ٹائلز فضا میں نہیں لیے جائے گئے تھے۔ تاہم خلابازوں نے بین الاقوامی خلائی سٹیشن پر کافی عرصے سے خراب جگہ کے تعین کرنے والے اینٹینے کی مرمت کی اور سٹیشن کی ایک دوربین کو برقی رو کی فراہمی بحال کی۔ | 
یہ صفحہ دوست کو ای میل کیجیئے
پرِنٹ کریں
