 |  پروگرام کے مطابق ڈسکوری کو بدھ کے روز لانچ کیا جانا تھا |
امریکی خلائی شٹل ڈسکوری میں فنی خرابیوں کی وجہ اس کے لانچ کے پروگرام میں تبدیل کر دی گئی ہے۔ شٹل کو آج بدھ کے روز لانچ کیا جانا تھا۔ ناسا کے حکام نے ڈسکوری کو خلا میں بھیجنے کی نئی تاریخ نہیں بتائی ہے لیکن کہا ہے کہ شٹل کو بہت جلد روانہ کر دیا جائے گا۔ حکام نے کہا ہے کہ ہو سکتا ہے کہ ڈسکوری کو سنیچر کے روز خلا میں لانچ کر دیا جائے۔ کولمبیا کی تباہی کے ڈھائی سال بعدامریکی خلائی شٹل ڈسکوری کو خلاء میں بھیجنے کے کئی پروگرام بنائے گئے لیکن آخری موقعوں پر ان کو موخر کر دیا جاتا ہے۔ ایک روز پہلے خلائی شٹل کی ایک کھڑکی کا پلاسٹک کور گر جانے سے شٹل کی کئی ٹائلیں متاثر ہوئیں تھیں لیکن شٹل کی مینیجر نے اس کو معمولی واقعہ قرار دیتے ہوئے کہا تھا کہ اس سے شٹل کی روانگی پر کوئی اثر پڑنے کے بارے میں ان کو علم نہیں ہے۔ انہوں نے کہا کہ کھڑکی کو مرمت کر دیا گیا ہے۔ حکام نے شٹل کی روانگی کے شیڈول میں تبدیلی کا اعلان کرتے ہوئے کہا کہ پروگرام میں چند دن کی تاخیر ہو سکتی ہے۔ پروگرام کے مطابق سات خلاء نورد ڈسکوری کو اڑائیں گے اور وہ فلوریڈا میں ناسا کے اڈے پر پہنچ گئے ہیں۔ امریکی خلائی ایجینسی ناسا نے اس خلائی شٹل کی اڑان کا وقت تین اکیاون ای ڈی ٹی ( سات بج کر اکیاون جی ایم ٹی) مقرر کیا ہے۔ کولمبیا کی تباہی کے بعد تحقیقات مکمل ہونے تک کے لیے امریکہ کے تمام خلائی مشن معطل کردیے گئے تھے۔ کولمبیا شٹل میں سات خلاء باز ہلاک ہوئے تھے۔ ناسا کے حکام کے مطابق اس خلائی مشن کے نظام اور فیول ٹینک سسٹم کو پہلے سے بہتر بنانے کی کوشش کی گئی ہے۔ پہلے یہ مشن مارچ میں فلوریڈا کے کینیڈی سپیس سنٹر سے روانہ کیا جانا تھا تاہم فلوریڈا میں شدید طوفان کے باعث یہ منصوبہ پایہ تکمیل کو نہ پہنچ سکا۔ اب تک بھیجے گئے کل 113 خلائی مشنز میں سے دو حادثے کا شکار ہوئے ہیں۔ | 
یہ صفحہ دوست کو ای میل کیجیئے
پرِنٹ کریں
