متبادل ماں ٹریسا اینڈرسن پانچ جڑواں بچوں کی پیدائش سے تین ہفتے بچوں کے والدین کے ساتھ۔

پچیس سالہ ٹریسا اینڈرسن نے امریکی ریاست ایریزونا میں پانچ منٹ میں پانچ لڑکوں کو جنم دیا۔

متبادل ماں (surrogate mother) ایسی عورت کو کہا جاتا ہے جو کسی اور عورت کی خاطر مصنوعی تخم ریزی کے ذریعے نطفہ قبول کرتی ہے۔

ٹریسا اینڈرسن نے اپنی خدمت کے لیے پندرہ ہزار امریکی ڈالر کا معاوضہ لینے سے انکار کر دیا۔ ٹریسا اینڈرسن نے کہا کہ ماں کو پانچ بچوں کے بہت اخراجات اٹھانے پڑیں گے اس لیے وہ ان سے معاوضہ نہیں لے گی۔

بچوں کے خلقی والدین لویزہ گانزالیز اور اینریک مورینو نے بیٹوں کا نام جورج، اینریک، گیبریل، وکٹر اور جیویر رکھے ہیں۔

ڈاکٹروں کا کہنا ہے کہ پانچ لڑکوں میں سے ایک جیویر کے دل میں خرابی ہے اور اس کو ٹھیک کرنے کے لیے آپریشن کے ضرورت ہو گی۔

ٹریسا اینڈرسن کی کوکھ میں پانچ ایمبوریو( کچے بچے) لگائے تھے تاکہ ان میں سے کم از کم ایک نشورنما پا سکے لیکن وہ تمام مکمل بچے بن گئے۔

ڈاکٹروں کا کہنا ہے کہ ٹریسا اینڈرسن چل کر ہسپتال آئی تھیں اور جب ان کو پتہ چلا کہ ان کی کوکھ پانچ بچے ہیں تو انہوں نے اپنا معاوضہ نہ لینے کا فیصلہ کیا۔

ٹریسا اینڈرسن کے شوہر نے کہا ہے کہ وہ متبادل ماں کا رول مکمل ہونے پر خوش ہیں اور آرام کر رہی ہیں۔

بچوں کے والد مورینو نے کہا کہ وہ ایک بچے کے متمنی تھے لیکن اگر پانچ آ گئے تو اس کی بھی کوئی وجہ ہو گی اور وہ بہت خوش ہیں۔ انہوں نے کہا کہ پانچ بچوں کو پالنا مشکل ہو گا لیکن وہ اپنی پوری کوشش کریں گے اور اللہ بہتر کرئے گا۔