ایشیائی خواتین اور سرطان کے خطرات تحقیق سے ثابت ہوا ہے کہ برطانیہ میں بسنے والی ایشیائی خواتین میں سے چند کے سینے کے سرطان میں مبتلا ہونے کا امکان بہت زیادہ اور کچھ میں بہت کم ہے۔ ماہرین کے مطابق بھارت اور پاکستان سے تعلق رکھنے والی مسلمان خواتین کے سینے کے سرطان میں مبتلا ہونے کا امکان گجراتی ہندو خواتین کی نسبت کہیں زیادہ ہے۔ لندن سکول آف ہائی جین کے تحقیقات کاروں کا خیال ہے کہ امکان کم یا زیادہ ہونے کا تعلق طرز معاشرت اور عادات مثلاً کھانے پینے کا رجحان ، بچوں کی تعداد، وزن وغیرہ سے ہے۔ یہ تحقیقات برطانوی جریدے ’برٹش جرنل آف کینسر‘ میں شائع ہوئی ہیں۔ تحقیقات کاروں نے خواتین کو مختلف گروپوں میں تقسیم کیا جن میں گجراتی ہندو، پنجابی ہندو، پنجابی سکھ، پاکستانی، بھارتی مسلم اور بنگلہ دیشی مسلم گروپ بنائے گئے تھے۔ تحقیق سے یہ بھی ثابت ہوا ہے کہ عمومی طور پر برطانیہ میں بسنے والی جنوبی ایشیائی خواتین میں سرطان میں مبتلا ہونے کا خطرہ آئر لینڈ، سکاٹ لینڈ اور ویلز کی نسبت کم ہے۔ اس تحقیق کی نگراں ڈاکٹر ویلری میکورمیک نے کہا کہ یہ حقیقت ہے کہ وہ خواتین جن کے بچے چھوٹی عمروں میں ہوں، زیادہ ہوں اور جو انہیں اپنا دودھ پلاتی ہیں ان کے سرطان میں مبتلا ہونے کا امکان کم ہوتا ہے۔ لیکن ان کا کہنا ہے کہ یہ حالیہ تحقیق ثابت کرتی ہے کہ ان وجوہات کے علاوہ طرز معاشرت اور دیگر کئی عادات بھی سرطان کے امکان کا باعث ہیں۔ انہوں نے کہا کہ اگرچہ پاکستانی اور بھارتی مسلمان خواتین کی شادیاں اور پھر بچے کم عمری میں ہوتے ہیں لیکن پھر بھی ان کے سرطان میں مبتلا ہونے کا امکان گجراتی ہندو خواتین سے زیادہ ہے۔ گجراتی خواتین سبزیاں اور پھل زیادہ کھاتی ہیں۔ اوسطاً ان کی کمر بھی پاکستانی اور مسلم خواتین سے پتلی ہے اور مٹاپے کا رجحان کم ہے۔ تحقیقات کاروں کا یہ بھی کہنا ہے کہ برطانیہ میں جنوبی ایشیائی خواتین میں سرطان میں مبتلا ہونے کا رجحان تیزی سے بڑھ رہا ہے۔ | 
یہ صفحہ دوست کو ای میل کیجیئے
پرِنٹ کریں
