جنگلی حیات کی فوٹوگرافی: ’فلسفی‘ بندر، نڈھال تیندوا اور ہر پائپ میں الّو

چٹان پر بیٹھے دو چپٹی ناک والے بندر دور دیکھتے ہوئے کچھ سوچ رہے ہیں۔

لیکن اس معاملے پر زیادہ سوچ بچار کی ضرورت نہیں ہے۔ یہ دونوں دراصل بندروں کے درمیان ہونے والی لڑائی کا نظارہ کر رہے ہیں۔

اس تصویر نے لندن کے نیچرل ہسٹری میوزیم کے 2018 کے جنگلی حیات کے سال کے بہترین فوٹوگرافر کے مقابلے میں پہلا انعام حاصل کیا ہے۔

یہ تصویر مارسل فان اوسٹن نے چین کے کوہِ چنگ لنگ میں کھینچی۔ نیدرلینڈز سے تعلق رکھنے والے فوٹوگرافر نے بندروں کے اس گروہ کا کئی دنوں تک پیچھا کیا تاکہ وہ ان کے رویے سے اچھی طرح سے واقف ہو سکیں۔

ججوں کی چیئرپرسن روز کڈمین نے کہا کہ جنگلی حیات کی تصاویر عام طور پر ڈرامائی ہوتی ہیں لیکن اس میں کوئی ایسی خاص چیز ہے کہ ہم بار بار اس کی طرف آتے رہے جس کی وجہ اس کے رنگ اور کمپوزیشن ہے۔

نڈھال تیندوا (سکائی میکر)

زمرہ: نوجوان فوٹوگرافر

اس زمرے کے فاتح جنوبی افریقہ کے 16 سالہ سکائی میکر ٹھہرے جنھوں نے بوٹسوانا میں اس خواب آلودہ تیندوے کی تصویر لی۔

یہ تیندوا ایک ٹانگ سے لنگڑا ہے۔ مقامی لوگ اسے اچھی طرح سے جانتے ہیں اور اسے ماتھوجا کہتے ہیں۔ اپنی معذوری کی وجہ سے اسے خوراک حاصل کرنے کے لیے دوسرے درندوں کے مقابلے پر زیادہ محنت کرنا پڑتی ہے۔

میکر کہتے ہیں کہ ’ہم نے یہ تصویر لینے کے لیے کئی گھنٹے انتظار کیا۔ میں چاہتا تھا کہ ماتھوجا کی آنکھیں کھلی ہوں۔ ایک لمحے کے لیے اس نے سیدھا ہماری طرف دیکھا۔‘

ہر پائپ میں الو (ارشدیپ سنگھ)

زمرہ: دس سال سے کم عمر فوٹوگرافر

یہ تصویر دس سالہ ارشدیپ سنگھ نے انڈین پنجاب کے شہر کپورتھلہ میں لی۔ وہ کہتے ہیں: ’میں نے پائپ کے اندر الو اڑتے دیکھے اور اپنے والد کو بتایا۔

وہ کہنے لگے یہ ممکن نہیں ہے۔ لیکن انھوں نے گاڑی روک دی۔ ہم نے 20 سے 30 منٹ انتظار کیا اور جونھی الو دوبارہ نظر آئے، میں نے تصویر لے لی۔‘

سیل کا جمگھٹا (کرسٹو بال سیرانو)

زمرہ: جانور اپنے ماحول میں

سپین سے تعلق رکھنے والے کرسٹوبال سیرانو نے یہ تصویر اینٹارکٹیکا میں اس وقت کھینچی جب سیل برف کے ایک تختے پر آرام کر رہی تھیں۔

وہ برف پر الجی اور چھوٹے کرسٹاشین کی تلاش میں آتی ہیں۔

کیچڑ کی گیند اور بھڑیں (جورجینا سٹیٹلر)

زمرہ: غیر فقاریہ جانور

جورجینا نے یہ تصویر آسٹریلیا میں اس حالت میں کھینچی کہ انھیں خود بھی کیچڑ میں اترنا پڑا۔

’میں نے لمبے لینز سے کئی تصویریں لیں۔ میں چاہتی تھی کہ ایک بھڑ کی اس وقت تصویر لوں جب وہ کیچڑ کی گیند اٹھا رہی ہو، لیکن مجھے ایک کی بجائے دو بھڑیں مل گئیں۔‘

بھڑیں کیچڑ کی مدد سے اپنے گھونسلے تعمیر کرتی ہیں۔

رنگین پرواز (پیٹرک اونیل)

زمرہ: زیرِ آب

اڑتی ہوئی مچھلی کی یہ تصویر امریکی فوٹوگرافر پیٹرک اونیل نے فلوریڈا کی پام بیچ پر لی۔ یہ مچھلیاں دن کو چھپی رہتی ہیں لیکن رات کو کھل کھیلتی ہیں۔

اداس مسخرہ (جواین دے لا میلا)

زمرہ: صحافیانہ فوٹوگرافر

یہ تصویر انڈونیشیا کے جزیرے جاوا میں لی گئی۔ یہ مکاک بندر ہے جسے مسخروں کے روپ میں بازاروں میں نچوایا جاتا ہے۔

جواین نے کہا: ’یہ بہت دردناک ہے کہ بندر اسے اتارنے کی کوشش کر رہا ہے۔‘

ممتا (ہاویر اسنار گونسالس)

زمرہ: پورٹ فولیو فوٹوگرافر

سپین کے ہاویر نے اس جھینگر کی تصویر ایکواڈور میں لی، جس میں ایک ماں اپنے بچوں کو بچاتی ہوئی نظر آتی ہے۔

گتھم گتھا (ڈیوڈ ہیراسمٹسچک)

زمرہ: جل تھلیے اور رینگنے والے جانور

امریکی ریاست ٹینیسی فوٹوگرافر ٹیلیکو ریور نے یہ تصویر اس وقت کھینچی جب ایک ہیل بینڈر چھپکلی نے سانپ کو اپنے جبڑوں میں جکڑ رکھا تھا۔

تاہم ڈیوڈ کہتے ہیں کہ سانپ بالآخر چھپکلی کے چنگل سے نکلنے میں کامیاب ہو گیا تھا۔

ہوا کے دوش پر (اورلینڈو فرنانڈیس میرانڈا)

زمرہ: زمین کا ماحول

نمیبیا کے ساحل پر واقع اس صحرا کو ہوائیں ہر پل مختلف روپ دیتی رہتی ہیں۔ سمندر سے آنے والی دھند اپنے ساتھ نمی لے کر آتی ہے جو صحرائی جانداروں کے لیے نعمت سے کم نہیں۔

اس مقابلے کا آغاز 1964 میں ہوا تھا اور یہ اپنی نوعیت کا سب سے پروقار انعام ہے۔