احمد کمال سابق پاکستانی سفارتکار

	لبنان جن ترامیم کا مطالبہ کر رہا ہے وہ کوئی چھوٹی تبدیلیاں نہیں

اب سب کو سمجھ آ چکا ہے کہ قرارداد میں بہت خامیاں ہیں اور اس کا زیادہ فائدہ اسرائیل کو ہے۔

آپ دیکھیئے ایک طرف حزب اللہ سے کہا جا رہا ہے کہ آپ کارروائی ایک دم بالکل بند کردیں جبکہ دوسری طرف اسرائیل سے کہا جا رہا ہے کہ آپ کی آٹھ دس ہزار فوج نہ صرف لبنان میں رہ سکتی ہے بلکہ اگر اسرائیل کو کوئی خطرہ ہو تو وہ اپنی فوجی کارروائی بھی جاری رکھ سکتے ہیں۔

اس کا جو ردِ عمل سامنے آیا ہے اس میں اسرائیل کے ترجمان نے کہا ہے کہ جب تک قرارداد پاس نہ ہو جائے ہم اپنی کارروائی جاری رکھیں گے، حملے کرتے رہیں گے اور شاید بڑھا بھی دیں۔

دوسری طرف لبنان نے اسے مسترد کر دیا ہے کیونکہ اس کا کہنا ہے کہ اگر اسرائیلی فوج لبنان میں موجود رہے گی تو حزب اللہ کو جنگ بندی پر کیسے مجبور کیا جا سکتا ہے۔ لبنان نے کہا ہے کہ قرارداد کو منصفانہ بنانے کے لیئے اس میں تمام اسرائیلی فوج کے انخلاء کا مطالبہ شامل کیا جائے۔

اس صورت حال کی روشنی میں یہ بات واضح ہے کہ لبنان جن ترامیم کا مطالبہ کر رہا ہے وہ کوئی چھوٹی تبدیلیاں نہیں ہیں جن کو آسانی سے مان لیا جائے گا۔ یہ تو بہت بڑی تبدیلیاں ہیں جن پر لگتا ہے بحث ذرا لمبی ہوگی۔

جہاں تک سفارتکاری کے عمل کا سوال ہے اس کے بارے میں کہا جا سکتا ہے بات وہیں پر ہے جہاں سے شروع ہوئی تھی۔ یعنی اسرائیل لبنان اور فلسطین کے مقبوضہ علاقوں پر بیٹھا رہے گا۔ جو لبنانی اور فلسطینی اسرائیل کی قید میں ہیں ان کی کوئی بات نہیں ہوئی۔ اسرائیل نے شمالی لبنان میں جو بارودی سرنگیں بچھائی ہوئی ہیں ان پر کوئی بات نہیں ہوئی اور کسی کو یہ حق نہیں مل رہا کہ سوال پوچھے یا اعتراض کرے۔

جہاں تک قرارداد کی منظوری کا تعلق ہے اس میں دو امکانات موجود ہیں۔ پہلا امکان یہ ہے کہ دھکا مار کر اس قرارداد کو منظور کرانے کی کوشش کی جائے گی۔ اگر سلامتی کونسل کے پانچوں مستقل ارکان اس قرارداد پر متفق ہو گئے تو لگتا ہے اس قرارداد کو چودہ ووٹ مل جائیں ہیں۔ صرف قطر اس کی مخالفت کرے گا۔

دوسرا امکان یہ ہے کہ کارروائی روکی جائے اور ایسی قرارداد پاس کی جائے جو یکطرفہ نہ ہو لیکن ایسی قرارداد کے لکھنے میں شاید ہفتے لگ جائیں۔