شمالی کوریا نے بدھ پانچ جولائی کو میزائل تجربے کیے تھے

جاپان نے یہ پابندیاں بدھ کو شمالی کوریا کے میزائل تجربوں کے جواب میں لگائی تھیں۔

جاپان کے خبر رساں ادارے کیوڈو کے مطابق جاپان اور کوریا کے مابین مذاکرات کے لیئے شمالی کوریا کے سفیر سونگ اِل ہو نے پابندیوں کو انتہائی نا مناسب قرار دیتے ہوئے شمالی کوریا کے ممکنہ رد عمل کے بارے میں بات کی ہے۔

جاپان کی طرف سے عائد ان پابندیوں میں جاپانی بندرگاہوں میں شمالی کوریائی کشتیوں اور بحری جہازوں کے داخلے پر پابندی بھی شامل ہے۔

ادھر جنوبی کوریا کے خبر رساں ادارے ’یون ہاپ‘ کے مطابق جنوبی کوریا نے شمالی کوریا کی اس تجویز کو رد کر دیا ہے جس میں اس نے کہا تھا کہ دونوں ممالک میں عسکری مذاکرات شروع کر دیے جائیں۔ سیول حکومت کا کہنا ہے کہ اس قسم کے مذاکرات کے لیئے یہ وقت اور ماحول غیر مناسب ہے اور وہ اس کے لیئے کوئی اور تاریخ مقرر کرنے کی تجویز دے گی۔

دریں اثنا شمالی کوریا کے لیئے امریکہ کے سینئر مذاکرات کار کرِسٹوفر ہِل نے بیجنگ میں چین کے اعلیٰ اہلکاروں سے ملاقات کی ہے جس میں میزایل تجربوں پر بین الاقوامی رد عمل پر بات ہوئی ہے۔

شمالی کوریا کے لیئے جاپان کے سینئیر مندوب بھی جمعرات کو اس معاملے پر بات چیت کرنے کے لیئے چین پہنچ رہے ہیں۔