اعجاز مہر بی بی سی اردو ڈاٹ کام، پورٹ سلیمان

	خلیج میں سمندری حدود کی حفاظت کے لئے مختلف ممالک کے 45 جہاز تعینات ہیں

پاکستان بحریہ کے ریئر ایڈمرل شاہد اقبال نے ’ٹاسک فورس 150‘ نامی اس فورس کے نئے کمانڈر کی حیثیت سے چارج لیا ہے۔

اس ٹاسک فورس کی سربراہی عام طور پر ہر چار ماہ میں تبدیل ہوتی ہے۔ 25 لاکھ مربع میل سمندری حدود کی حفاظت امریکہ اور اس کی اتحادی افواج کی ذمہ داری ہے جس میں سے 20 لاکھ مربع میل علاقے کی ذمہ داری ’ٹاسک فورس 150‘ کی ہے۔

اس سے پہلے اس ٹاسک فورس کی سربراہی نیو زی لینڈ کے پاس تھی اور انہوں نے یہ ذمہ داری پیر چوبیس اپریل کو بحرین کی بندرگاہ ’مینا سلیمان‘ پر منعقدہ ایک تقریب میں پاکستان کے حوالے کی۔

اس کثیر الملکی فوج میں امریکہ، برطانیہ، جرمنی، فرانس، اٹلی اور دیگر ممالک کی افواج شامل ہیں۔ امریکی بحریہ کے ایک ترجمان چارلز براؤن نے بی بی سی کو بتایا کہ مجموعی طور پر سمندری حدود کی حفاظت کے لئیے دنیا کے مختلف ممالک کے پینتالیس جہاز اور بیس ہزار فوجی اہلکار تعینات ہیں جس میں سے زیادہ تر افراد ’ٹاسک فورس 150‘ کے ہی ما تحت ہیں۔

ٹاسک فورس کی کمان سنبھالنے والے ریئر ایڈمرل شاہد اقبال نے برطانیہ کے ’سکول آف میری ٹائم آپریشنز‘ کا ’پرنسپل وارفیئر شپیشلائزیشن‘ کورس کیا ہوا ہے۔

ہالینڈ کے جہاز پر منعقد اس تقریب کی کوریج کے لئیے پاکستان بحریہ نے اسلام آباد سے کئی صحافیوں کو لانے کا انتظام کیا ہے۔

پاکستان کو امریکہ کی جانب سے یہ اہم کمان ملنے کے بارے میں وائس ایڈمرل محمد ہارون کا کہنا تھا کہ یہ پاکستان کی دہشت گردی کے خلاف جنگ میں اہم کردار ادا کرنے پر اعتماد کا اظہار ہے۔

پاکستان کو امریکہ کی جانب سے یہ اہم کمانڈ ملنے کے بارے میں وائس ایڈمرل محمد ہارون کا کہنا تھا کہ یہ پاکستان کی دہشت گردی کے خلاف جنگ میں اہم کردار ادا کرنے پر اعتماد کا اظہار ہے۔

پاکستان کو امریکہ نے نیٹو کا اہم غیر رکنی اتحادی کا درجہ دے رکھا ہے اور یہ پہلا غیر رکنی ملک ہے جسے اس کثیر الملکی فوج کی سربراہی سونپی گئی ہو۔