عراق میں سن دوہزار پانچ میں تشدد کے واقعات میں اضافہ ہوا ہے

تفصیلات کے مطابق بغداد کے جنوبی ضلع دورا میں ایک کار بم حملے میں چار افراد ہلاک اور اکیس زخمی ہوگئے ہیں۔

پولیس ذرائع کے مطابق بم دھماکہ ایک شیعہ مسجد سے دس میٹر کے فاصلے پر ہوا جبکہ بہت سے لوگ جمعہ پڑھنے کے لیے جمع ہورہے تھے۔

عراق میں شیعہ فرقے سے تعلق رکھنے والوں کو اکثر مزاحمت کار ان بم دھماکوں کا نشانہ بناتے ہیں۔

دریں اثناء فلوجہ شہر کے قریب جمعرات کو مزاحمت کاروں کے ایک حملے میں دو امریکی میرین ہلاک ہو گئے تھے۔

امریکی فوجی ذرائع کے مطابق امریکی فوج کے ایک گشتی دستے پر فلوجہ کے قریب مزاحمت کاروں نے حملہ کیا جس میں دو امریکی میرین ہلاک ہو گئے۔

مارچ دو ہزار تین میں عراق پر امریکی حملے کے بعد سے اب تک دو ہزار دو سو ساٹھ امریکی فوجی عراق میں ہلاک ہو چکے ہیں۔

فلوجہ شہر میں امریکی فوجیوں نے نومبر دو ہزار چار کے حملے کے بعد سے سخت سکیورٹی انتظامات کر رکھے ہیں۔

بین الاقوامی فورسز کی طرف سے جاری کردہ اعداد وشمار کے مطابق دو ہزار چار کی بنسبت دو ہزار پانچ میں امریکی فوج پر حملوں میں شدید اضافہ ہوا ہے۔

ان اعداد وشمار کے مطابق گھریلو ساخت کے بم حملوں کے واقعات دو ہزار چار میں پانچ ہزار چھ سو سات سے بڑھ کر دوہزار پانچ میں دس ہزار پانچ سو ترانوے ہو گئے۔

خودکش کار بم حملے دوہزار چار میں ایک سو تینتیس سے بڑھ کر دوہزار پانچ میں چار سو گیارہ ہو گئے۔

جسم پر بم باندھ کر کیے جانے والے حملوں کے واقعات سن دو ہزار چار میں صرف سات ہوئے تھے جبکہ دو ہزار پانچ میں اس طرح کے سڑسٹھ واقعات ہوئے۔

امریکی حکام کا کہنا ہے کہ ان اعداد شمار سے یہ نتائج اخذ کرنا غلط ہو گا کہ مزاحمت کار عراق میں کامیاب ہو رہے ہیں۔ امریکی حکام کا کہنا ہے کہ مزاحمت کاروں کی کارروائیاں اتنی موثر نہیں رہیں۔