 | | | دونوں کے بارے میں مشہور ہے کہ وہ بہت اچھے گھڑ سوار ہیں۔ |
اس سال کی سب سے شاہانہ تقریب میں جہاز رانی کی دنیا کے بے تاج بادشاہ آنجہانی ارسٹوٹل اوناسس کی پوتی کی شادی برازیل کے اولمپیئن ڈوڈا مرنڈا سے انجام پائی ہے۔ بی بی سی کے نامہ نگار کے مطابق اوناسس گھرانے کے تین بلین ڈالر مالیت کے اثاثوں کی واحد مالکہ بیس سالہ ایتھینا رسل اوناسس کی شادی کی تقریب سنیچر کو برازیل کے شہر ساؤپالو میں منعقد ہوئی۔ ان کے شوہر برازیل کی طرف سے اولمپکس میں شو جمپنگ میں میڈل جیت چکے ہیں۔ یہ تقریب ایک عجائب گھر کے سجے ہوئے میدان میں ہوئی جہاں شیمپین کی ہزاروں بوتلیں کھلیں اور مہمان نہایت لذیذ فرانسیسی کھانوں سے لطف اندوز ہوئے۔ اس موقع پر حفاظتی انتظامات اتنے سخت تھے کہ تمام مہمان صرف پہلے سے جاری کیے گئے سیکورٹی کارڈ کے ذریعے عجائب گھر کے دروازوں سے داخل ہو سکتے تھے۔ ان انتظامات کے باوجود بھی ایک فرانسیسی فوٹوگرافر بیروں کا لباس پہن کر تقریب میں پہنچنے میں کامیاب ہو گیا۔ سکیورٹی اہلکاروں نے اس کا کیمرہ چھین لیا لیکن وہ ایک ڈیجیٹل فوٹو کارڈ تقریب سے ’سمگل‘ کرنے میں کامیاب ہو گیا۔اس کارڈ پر محفوظ تصاویر شاید اس سال کی سب سے شاہانہ تقریب کی واحد تصویری یادگار ثابت ہوں۔
| 
برونائی میں پُرتعیش شادی
