فرانس میں حکمراں اور اپوزیشن کی کچھ جماعتوں نے ہاں ووٹ کی اپیل کی ہے

اب تک کی پیش گوئیوں کے مطابق لوگوں کا زیادہ جھکاؤ نہ ووٹ کی طرف ہے۔

تاہم مبصر اس بات پر متفق ہیں ووٹروں کا رجحان ہاں میں ہو یا نہ میں یہ ریفرنڈم بہت اہم ہے اور خیال ہے کہ ہاں اور نہ کے ووٹوں میں بہت زیادہ فرق نہیں ہوگا۔

نامہ نگاروں کا کہنا ہے کہ فرانس کے لوگ یورپی آئین کے مسئلے پر دو حصوں میں بٹ گئے ہیں۔

یورپی آئین کی وجہ سے یورپی اتحاد کو جس میں ممالک کی تعداد بڑھ کر پچیس ہوگئی ہے فیصلہ سازی کو بہتر بنانا ہے۔ قانون بننے کے لیے یورپی آئین کی منظوری پچیس کے پچیس ممالک کو دینی ہوگی۔

اب تک نو ممالک نے یورپی آئین کی توثیق کر دی ہے تاہم فرانس واحد ملک ہے جس نے اپنے شہریوں پر لازم کر دیا ہے کہ وہ اس معاملے پر اپنی رائے کا اظہار کریں۔

اگر فرانس کے لوگوں نے نہ میں ووٹ دے دیا تو اس کا مطلب یہ ہوگا کہ یورپی آئین کا معاملہ کھٹائی میں پڑ جائے گا۔

رائے عامہ کے تازہ ترین جائزوں کے مطابق ناں ووٹ کی مخالفت کم ہوکر باون فیصد ہو گئی ہے جبکہ ایک دوسرے جائزے کے رو سے یورپی آئین کے خلاف ملک کے 56 فیصد عوام ہیں۔

نہ ووٹ کے حامی کہتے ہیں کہ اگر یورپی آئین کو قانون کا درجہ حاصل ہوگیا تو فرانس میں ملازمتوں، تنخواہوں اور معیارِ زندگی کو محفوظ رکھنا بہت مشکل ہو جائے گا۔

تاہم اس کے حامیوں کا کہنا ہے کہ ہاں ووٹ سے یورپ میں فرانس کا اثر رسوخ بڑھ جائے گا۔

فرانس میں حکمراں اور اپوزیشن جماعتوں کے ایک دھڑے نے ووٹروں سے اپیل کی ہے کہ وہ ہاں میں ووٹ دیں۔ خود فرانس کے صدر ژاک شیراک نے ایک سے زیادہ مرتبہ ٹیلی وژن پر لوگوں سے اپیل کی ہے کہ وہ ریفرنڈم میں ہاں ووٹ دیں۔

یورپی آئین دراصل یورپی یونین کے پچیس ممبر ملکوں کے مابین ایک معاہدہ ہے۔ اور اگر کسی ایک ملک نے بھی اس کی توثیق نہیں کی تو اس پر عمل درآمد نہیں ہو سکے گا۔ یعنی فرانس میں ناں کے ووٹ کا مطلب ہوگا کہ آئین اپنی موت آپ مرگیا۔ تاہم مبصرین کا کہنا ہے کہ ایک بار ناں کی صورت میں فرانس اس پر دوبارہ ووٹنگ کرواسکتا -