عمر آفریدی بی بی سی اردو ڈاٹ کام، لندن

فرانس کے صدر نے عوام سے ریفرنڈم میں ’ہاں‘ ووٹ کی اپیل کی ہے

فرانسسی عوام کے تیور دیکھتے ہوئے سابق صدر ویلری گیسکارڈ ایستانگ نے شہریوں سے پرزور اپیل کی ہے کہ وہ آئین کے حق میں ووٹ دیں۔ صدر گیسکارڈ اس آئین کے مرتب کرنے والوں میں سے ہیں۔ سابق فرانسسی صدر نے جرمنی کے ایوان بالا سے بھی خطاب کیا اور کہا کہ جرمن اور فرانسسی تائید کے بعد یورپ میں ایک سنہری دور کا آغاز ہوگا۔

جرمنی کی پارلیمنٹ نے آج بھاری اکثریت سے اس آئین کی منطوری دیدی ہے۔

فرانس میں یورپی آئین سے متعلق مہم کے اس آخری روز اس آئین کی تائید کے لیے راہ ہموار کرنے کی خاطر جرمن چانسلر گیرہارڈ شروڈر اور سپین کے وزیراعظم ہوزے لؤس فرانس پہنچ رہے ہیں۔

اس پورے معاملے کے بارے میں چند بنیادی سوالات سامنے آ رہے ہیں۔

آئین کی مخالفت کیوں کی ہو رہی ہے؟

یورپی آئین پر ریفرنڈم کے معاملے نے فرانس کو تقسیم کر دیا ہے۔ ایک طرف فرانس کی سیاسی اشرافیہ ہے تو دوسری جانب فرانس کے مزدور اور ٹریڈ یونین والے ہیں۔ فرانس میں یورپی یونین کے آئین کی مخالفت کرنے والوں کا خیال ہے اس سے بڑے تجارتی اداروں کو فائدہ ہوگا جب عام لوگوں کو بے روزگاری کا سامنا کرنا پڑے گا۔

مگر کیا ان لوگوں کو معلوم ہے کہ آئین میں ہے کیا؟

فرانس کی حکومت نے آئین کی چار کروڑ ساٹھ لاکھ کاپیاں تقسیم کی ہیں۔ لیکن پچھلے دو ہفتوں کے دوران آئین کے مخالفوں کی تعداد میں اضافہ نظر آیا ہے۔

اگر فرانس کے رائے دہندگان کی اکثریت نے آئین کی مخالفت کر دی تو کیا ہوگا؟

یہ آئین دراصل یورپی یونین کے پچیس ممبر ملکوں کے مابین ایک معاہدہ ہے۔ اور اگر کسی ایک ملک نے بھی اس کی توثیق نہیں کی تو اس پر عمل درآمد نہیں ہو سکے گا۔ یعنی فرانس میں ناں کے ووٹ کا مطلب ہوگا کہ آئین اپنی موت آپ مرگیا۔ تاہم مبصرین کا کہنا ہے کہ ایک بار ناں کی صورت میں فرانس اس پر دوبارہ ووٹنگ کرواسکتا ہے۔

اگر فرانسسی عوام کا جواب اثبات میں ہوا تو؟

اس سے آئین کی راہ میں حائل ایک بڑی رکاوٹ دور ہوجائے گی لیکن ابھی کچھ ایسے ملک ہیں جہاں آئین کے حق میں لوگوں کی تعداد کے بارے میں کچھ کہنا قبل از وقت ہوگا۔ ان میں نیدرلینڈ، چیک رپبلک اور برطانیہ وغیرہ ہیں۔

ایک سب سے اہم سوال یہ کہ کیا آئین کے بغیر یورپی یونین اپنے معاملات چلا لے گی؟
ہاں۔ کیونکہ اس وقت بھی کچھ ضابطے اور قوائد ایسے ہیں جن کے تحت یہ اپنے معاملات چلا رہی ہیں۔