کاشف قمر بی بی سی ٹیلاہاسی فلوریڈا

فلوریڈا کے نوجوان لوگوں کو ووٹ ڈالنے کے لیے آمادہ کرنے کی کوشش کر رہے ہیں۔

اختیارات کے غلط استعمال کے اس الزام میں چاہے حقیقت ہو یا نہیں، اس سے کوئی انکار نہیں کرتا کہ محروم ہوجانے والے ووٹروں کی بھاری اکثریت ڈیموکریٹک پارٹی کے حامیوں کی تھی۔ نتیجتاً ریاست میں اس بار ووٹروں میں زبردست جوش خروش پایا جاتا ہے۔

کوڈ پنک امریکی خواتین کا ایک غیرجانبدار ادارہ ہے جو متوسط اور نچلے طبقے کے ووٹروں کا شعور بیدار کرنے کے لیے کوشاں ہے۔ کوڈ پنک کی ترجمان سنڈی شیہان نے کہا کہ ہم لوگوں کو زیادہ سے زیادہ تعداد میں ووٹ ڈالنے پر آمادہ کررہے ہیں اور خواتین ان کا خاص محور ہیں۔

کوڈپنک کی کوشش ہے کہ غریب اور نچلے طبقے کے ایسے ووٹروں کو جن کے پاس پولنگ اسٹیشنوں تک جانے کا کوئی انتظام نہیں، ٹرانسپورٹ مہیا کی جائے۔ کوڈپنگ کی ترجمان کے مطابق اس بار نوجوان خاص طور پر یونیورسٹی کے طالب علم بڑی تعداد میں ووٹ ڈال رہے ہیں

اس بار کے صدارتی انتخاب میں بھی ڈیموکریٹک توپوں کا رخ ایک بار پھر جیب بش کی جانب ہے۔ فلوریڈا میں انتخابی بےقاعدگیوں کے الزامات کو ہوا ریاست کی صرف ایک کاؤنٹی میں ساٹھ ہزار کے لگ بھگ پوسٹل بیلٹ پیپروں کے لاپتہ ہوجانے کی اطلاعات سے بھی ملتی ہے جس کی ریاستی حکام تردید کررہے ہیں اور ان کا کہنا ہے کہ ڈیموکریٹ حلقے اس معاملے کو بڑھا چڑھا کر پیش کررہے ہیں۔

فلوریڈا میں انتخابی بےقاعدگیوں کے تنازعے کا ایک محور اسکرین چھوکر ووٹ ڈالنے والی مشینیں ہیں جن میں ووٹوں کی دوبارہ انفرادی گنتی کا کوئی انتظام نہیں ہے۔ تو اگر پچھلے انتخابات کی مانند اس بار بھی دوبارہ ضرورت پڑی تو کیا ہوگا۔

فلوریڈا میں ایک اور غیرجانبدار ادارے الیکٹورل ریفارم انفارمیشن پروجیکٹ کے سربراہ ڈین سیلگسن کہتے ہیں کہ اس بار پچھلے سال والے تنازعات نہیں ہوں گے لیکن نئے تنازعات ضرور سامنے آئیں گے۔

اس سارے قضیے کا ایک نتیجہ یہ بھی ہے کہ وکیلوں کی بن آئی ہے اور دونوں ہی جماعتوں نے پورے امریکہ میں ہر ریاست میں سینکڑوں وکیلوں کی خدمات حاصل کرلی ہیں تاکہ بوقت ضرورت قانونی چارہ جوئی میں تاخیر نہ ہو۔

اب جبکہ صدارتی انتخابات میں چار دن سے بھی کم وقت رہ گیا ہے، دونوں جماعتیں صرف فلوریڈا ہی نہیں باقی پورے ملک میں بھی اہم ریاستوں میں اپنے کارکنوں اور رضاکاروں کو متحرک کررہی ہیں اور یوں لگتا ہے کہ ماضی کے زیادہ تر انتخابات کے برعکس اس بار صدارتی انتخابات دو نومبر کے بعد بھی جاری رہیں گے چاہے عدالتوں میں کیوں نہ جاری رہیں۔