امریکی وزیر خارجہ اپنے بیان کی وجہ سے ایک بار پھر شہ سرخیوں میں ہیں

لیکن پیر کے روز نیویارک میں ایک تِھنک ٹینک سے خطاب کرتے ہوئے وزیر دفاع ڈونلڈ رمسفیلڈ کچھ اور ہی کہہ رہے تھے کہ انٹیلیجنس کی برادری میں اس بارے میں اختلافات ہیں کہ رابطہ کس قسم کا تھا۔ لیکن جہاں تک میری معلومات کا تعلق ہے مجھے اس رابطے کے بارے میں کوئی ٹھوس شہادت دیکھنے کو نہیں ملی ہے

وزیر خارجہ کا کہنا تھا کہ عراق میں اور خود بغداد کے اندر القاعدہ کے آدمیوں کی موجودگی کے بارے میں ہمارے پاس ٹھوس شہادتیں موجود ہیں اور باوثوق ذرائع سے معلوم ہوا ہے کہ یہ رابطے برسوں سے جاری ہیں اور امکان یہ ہے کہ کیمیاوی اور جراثیمی ایجنٹ کی ٹریننگ بھی دی جاتی رہی ہے۔

یہی نہیں بلکہ ڈونلڈ رمسفیلڈ نے حملے کے دوسرے جواز کے سلسلے میں بھی اپنا راگ بدل دیا ہے۔ پیر کے جلسے میں انہوں نے عراق کے وسیع تباہی کے ہتھیاروں کے بارے میں کہا کہ اتفاق یہ ہے کہ وسیع تباہی کے ہتھیار نہیں ملے۔ انٹیلی جنس غلط کیوں ثابت ہوئی میں اس بارے میں کچھ کہنے سے قاصر ہوں۔ کیونکہ مجھے معلوم نہیں۔

لیکن اسی کے ساتھ انہوں نے یہ ٹکڑا بھی لگا دیا کہ صدام حسین سے نجات حاصل کرکے دنیا کا بھلا ہوا ہے۔ تو کیا وزیر دفاع نے نئی راگنی الاپنی شروع کردی ہے۔ وہ تھنک ٹینک یعنی Council of Foreign Relations جس کے اجلاس میں پیر کو انہوں نے سوالوں کے جواب دیئے تھے اس کے ایک سینیئر فیلو چارلس کُپچن کا کہنا ہے کہ رمسفیلڈ نے واقعی اپنی راگنی بدل لی ہے۔ کیونکہ نائب صدر ڈک چینی اور بش انتظامیہ کے دوسرے لوگ اب بھی یہی کہہ رہے ہیں کہ القاعدہ اور صدام حسین میں رابطے تھے۔ اور میرا خیال ہے کہ رمسفیلڈ نے جو کچھ کہا ہے وہ وائٹ ہاؤس کے ہدایت پر نہیں ہے کیونکہ رمسفیلڈ اکثر اوقات قطار میں سے نکل کے اپنی الگ بات کرنے لگتے ہیں۔ لیکن ا نکے اس بیان سے معاملات میں پیچیدگی ضرور پیدا ہوگی۔

ابھی یہ بات ہو ہی رہی تھی کہ منگل کی شام سے پہلے ہی وزیر دفاع ڈونلڈ رمسفیلڈ کی طرف سے بیان آگیا کہ پیر کو جو بات میں نے کہی اس کا غلط مطلب نکالا گیا ہے۔