افغان حکومت کو منشیات کا دھندہ بند کروانے کے لئے تیس کروڑ ڈالر درکار ہیں

اطلاعات کے مطابق بدخشاں کے صوبے میں دو متحارب گروہوں کے درمیان جھڑپیں شروع ہوجانے کے بعد متعدد افراد علاقہ چھوڑ گئے ہیں۔

یہ واقعات ایسے وقت میں پیش آئے ہیں جب کابل میں ایک بین الاقوامی کانفرنس میں اس بات پر غور ہو رہا ہے کہ وہاں پوست کی کاشت پر کیسے قابو پایا جائے۔

افغانستان کے نائب وزیر داخلہ جنرل ہلال الدین ہلال نے بتایا ہے کہ یہ لڑائی منشیات کے لین دین پر شروع ہوئی۔ مقامی حکام کہتے ہیں کہ لڑائی کا آغاز سنیچر کو ہوا۔

حکام کے مطابق ضلع ارگو سے سینکڑوں لوگ نکل کر محفوظ مقامات کی طرف چلے گئے ہیں۔

صورتحال پر قابو پانے کے لئے صوبائی دارالحکومت فیض آباد سے سکیورٹی اہلکاروں کو متاثرہ علاقے میں بھیج دیا گیا ہے۔

صوبہ بدخشاں پوست کا کاشت اہم مرکز ہے۔خیال ہے کہ پچھلے سال یہاں دو ارب بیس کروڑ ڈالر کی افیم پیدا ہوئی۔