یہ صفحہ دوست کو ای میل کیجیئے		پرِنٹ کریں

ڈِک چینی پر بدعنوانی کا الزام لگتا رہا ہے

امریکی فوج نے عراق کی تیل کی صنعت کی مرمت کا ٹھیکہ ماضی میں نائب امریکی صدر ڈِک چینی سے وابستہ کمپنی ہیلی برٹن کو دے دیا ہے۔

مرمت کا ٹھیکہ جو کہ 1.2 ارب ڈالر کا ہے عراق میں ہیلی برٹن کی ذیلی کمپنی کیلوگ براؤن اینڈ رووٹ کو دیا گیا۔

یہ فیصلہ اس وقت کیا گیا ہے جب کہ وزارتِ دفاع کے حکام اس الزام کی تحقیقات کر رہے ہیں کہ کمپنی نے عراق میں تیل کی ترسیل میں گھپلے کیے تھے۔

ہیلی برٹن نے کسی بھی طرح کی بدعنوانی اور گھپلے کی تردید کی ہے۔

ڈیموکریٹ پارٹی کے اراکین نے کمپنی کو پہلے دیے جانے والے ٹھیکوں کی بھی مذمت کی تھی اور کہا تھا کہ بش انتظامیہ اپنے دوستوں کو ان کی خدمات کا صلہ دے رہی ہے۔

تین سال قبل جارج بش کے نائب صدر بننے سے پہلے ڈِک چینی ہیلی برٹن کے سربراہ تھے۔ انہوں نے انتخابات کے بعد ہیلی برٹن سے استعفیٰ دے دیا تھا۔