یہ صفحہ دوست کو ای میل کیجیئے		پرِنٹ کریں

شکیل اختر دلی

دریائے جمنا کے نزدیک واقع لال قلعہ مغلیہ سلطنت کے سنہری دور کی یادگار ہے

ہندوستان کے دارالحکومت دلی میں تاریخی لال قلعے کو پیر کے روز فوج نے پوری طرح خالی کر دیا۔

اب یہ قلعہ مکمل طور پر آثار قدیمہ کے اختیار میں ہوگا۔

دریائے جمنا کے نزدیک واقع لال قلعہ مغلیہ سلطنت کے سنہری دور کی یادگار ہے۔

اسے سترویں صدی میں مغل بادشاہ شاہجہان نے تعمیر کرایا تھا۔ اسی قلعے کے دیوان خاص میں تخت طاؤس واقع ہےجہاں بیٹھ کر مغل بادشاہ ہندوستان کے طول و عرض پر حکومت کرتے تھے۔

یہ سلسلہ سن اٹھارہ سو ستاون تک جاری رہا جب غدر کے دوران انگریز فوج نے دلی پر اپنے قبضے کے بعد اس وقت کے مغل بادشاہ بہادر شاہ ظفر کو قلعے سح نکل جانے کا حکم دیا تھا اور انہیں شہر کے جنوب میں واقع قطب مینار کے احاطے میں منتقل کر دیا تھا۔

سن اٹھارہ سو ستاون سے لے کر سن انیس سو سینتالیس تک لگل قلعہ برطانوی فوج کے قبضے میں رہا اور اس میں انہوں نے اکثر ہندوستانی قیدیوں کو قید رکھا۔

آزادی کے بعد لال قلعہ کے بیشتر حصے ہندوستانی فوج کے قبضے میں آگئے اور یہاں سنگین نوعیت کے مجرموں کو رکھنے کے سیل بھی بنائے گئے۔

پیر کو ایک سادہ تقریب میں وزیر دفاع جارج فرنینڈس نے علامت کے طور پر قلعے کی چابی سیاحت کے وزیر جگموہن کو پیش کی۔

حکومت اب یہ کوشش کر رہی ہے کہ اس قلعے کو اقوام متحدہ کے عالمی ورثے کی فہرست میں شامل کروایا جائے۔

ہر سال یوم آزادی کے موقع پر وزیر اعظم اسی قلعے کی فصیل سے خطاب کرتے ہیں۔

قلعے کے دو دروازے ہیں جن میں سے ایک دلی جبکہ دوسرا لاہوری دروازہ کہلاتا ہے۔

جب یہ قلعہ تعمیر کیا گیا تھا اس وقت دریائے جمنا اس کی عقب کی دیواروں کو چھوکر گزرتا تھا لیکن اب وہ کچھ فاصصلے پر بہتا ہے۔

محکمہ آثار قدیمہ نے آگرہ کے قلعے کو بھی فوج سے خالی کرانے کی درخواست کی ہے۔

یہ قلعہ مغل بادشاہ اکبر نے سولہویں صدی میں تعمیر کرایا تھا اور یہ تاج محل سے کچھ دور ہی واقع ہے۔