بنگلہ دیش: عاشورہ کے جلوس پر حملہ، ایک ہلاک 50 زخمی
،تصویر کا ذریعہAFP
بنگلہ دیش میں یومِ عاشور کے جلوس پر ہونے والے ایک بم حملے میں ایک شخص ہلاک اور کم سے کم 50 افراد زخمی ہوئے ہیں۔
پولیس کے مطابق دارالحکومت ڈھاکہ میں محرم کے جلوس میں شامل ہزاروں لوگوں پر دیسی بم پھینکے گئے۔
بنگلہ دیش کے اقلیتی شیعہ کمیونٹی کے رہنماؤں کا کہنا ہے کہ ملک میں پہلی بار محرم کے جلوس کو نشانہ بنایا گیا ہے۔
دھماکہ ڈھاکہ کے پرانے علاقے میں ہوا۔ جہاں شیعہ یومِ عاشور کے جلوس کے لیے جمع ہوئے تھے۔
پولیس نے جائے وقوعہ سے تین افراد کو گرفتار کیا ہے لیکن ان کی شناخت ظاہر نہیں کی ہے۔
ریپڈ ایکشن بٹالین کے کرنل ضیاء احسن نے کہا، ’خدشہ ہے کہ دہشت پھیلانے کے لیے ایسا کیا گیا ہے۔‘
مقامی پولیس کے سربراہ عزیز الحق نے خبر رساں ادارے ایجنسی اے ایف پی سے کہا، ’ہم نے دو بم برآمد کیے ہیں۔ وہ دھماکہ خیز مواداور دستی بم کی طرح ہیں۔ ان پر بیٹریاں لگی ہیں۔‘
،تصویر کا ذریعہAP
