چھیڑچھاڑ پر پٹائی کرنے والی لڑکیوں کے لیے انعام

بھارتی ریاست ہریانہ کی حکومت نے روہتک میں ایک بس میں چھیڑ چھاڑ کرنے والے تین نوجوانوں کی پٹائی کرنے والی دو لڑکیوں کو انعام دینے کا اعلان کیا ہے۔

خبر رساں ایجنسی پی ٹی آئی کے مطابق ریاستی حکومت دونوں بہنوں کو یوم جمہوریہ پر ان کی بہادری پر انعام دے گی۔

ہریانہ کے وزیر اعلی منوہر لال كھٹٹر نے ایک بیان میں یہ بھی کہا ہے کہ ریاست میں خواتین مسافروں کی حفاظت کو یقینی بنانے کے لیے موثر اقدامات کئے جائیں گے۔

حکومت نے ریاست کے پولیس ڈائریکٹر جنرل اور ٹرانسپورٹ کے محکمے سے مسافروں خاص کر عورتوں کا تحفظ یقینی بنانے کے لیے اقدامات کرنے کو کہا ہے۔

ریاست کے وزیر زراعت اوم پرکاش نے بھی دونوں بہنوں کو نقد انعام دینے کا اعلان کیا ہے۔

ادھر روہتک کے پولیس سپرنٹنڈنٹ ششانک نے بی بی سی ہندی کو بتایا ہے کہ اس معاملے میں گرفتار تینوں نوجوانوں کو 14 دن کے لیے عدالتی ریمانڈ پر جیل بھیج دیا گیا ہے اور پولیس ان کے خلاف چارج شیٹ تیار کر رہی ہے۔

پوجا اور آرتی نامی دو بہنوں نے بس میں ان کے ساتھ چھیڑ چھاڑ کرنے والے تین نوجوانوں کی بیلٹ سے پٹائی کی تھی۔

اس پورے واقعہ کی ویڈیو ایک موبائل فون میں بنا لی گئی تھی جو کہ ٹیلی ویژن چینلز پر چلی اور سوشل میڈیا پر وائرل ہوگئی۔

مرکزی وزیر اوما بھارتی نے اس واقعے پر ردعمل ظاہر کرتے ہوئے کہا، ’تمام لڑکیوں کو وہی کرنا چاہیے جو ان دونوں بہنوں نے کیا لیکن دکھ کی بات ہے کہ کوئی بھی مسافر ان کی مدد کے لیے آگے نہیں آیا۔‘

ان کا کہنا تھا کہ ’سماج کو اپنی ذہنیت کو تبدیل کرنا ہوگا اور ایسے واقعات پر محض تماشائی نہیں بنے رہنا چاہیے۔‘