آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
اسرا پناهی: سکول طالبہ سکیورٹی فورسز کے تشدد سے ہلاک ہوئی، ٹیچر کونسل
گذشتہ ہفتے ایران کے شمال مغربی علاقے اردبیل میں 15 سالہ اسرا پناہی کی موت کے بعد کونسل آف ٹیچرز کے سنڈیکیٹ نے ایک بیان میں دعوی کیا ہے کہ وہ ان طالبات میں شامل تھیں جو اردبیل میں پولیس کے ساتھ ہونے والے تصادم میں زخمی ہونے کے بعد ہسپتال میں وفات پا گئیں۔
تاہم ایرانی حکومت اس کی تردید کرتی ہے۔ سرکاری ٹی وی نے کہا ہے کہ اسرا پناہی کو پیدائشی طور پر دل کا عارضہ لاحق تھا۔
اسرا پناہی کی وفات پر اردبیل میں وسیع پیمانے پر مظاہرے شروع ہو گئے۔
اطلاعات کے مطابق کرد خاتون مہسا امینی کی ایران کی پولیس گشتِ ارشاد کے ہاتھوں مبینہ ہلاکت کے بعد شروع ہونے والے احتجاج میں کئی نوجوان لڑکیاں ہلاک ہو چکی ہیں۔
دو ہفتے قبل، سکول کی طالبات نے کلاس رومز، کھیل کے میدانوں اور سڑکوں پر مظاہرے شروع کر دیے تھے۔
آن لائن پوسٹ کی جانے والی ویڈیوز میں خواتین کو اپنے سکارف ہوا میں لہراتے، مرد اہلکاروں کا سامنا کرتے ہوئے اور ’عورت، زندگی، آزادی‘ اور ’آمر کو موت‘ جیسے نعرے لگاتے دیکھا جا سکتا ہے۔
اردبیل ٹیچرز یونین کے ایک بیان میں، جسے ٹیلی گرام پر ٹیچرز سنڈیکیٹ کی کوآرڈینیٹنگ کونسل نے پوسٹ کیا ہے، حکام پر الزام لگایا گیا ہے کہ بدھ کے روز حکام اردبیل کے شہید ہائی سکول میں لڑکیوں کو حکومت کے حق میں ہونے والے ایک پروگرام میں حصہ لینے کے لیے غیر قانونی طور پر مجبور کر رہے تھے جس میں انھیں حکم دیا گیا کہ وہ سپریم لیڈر کی تعریف میں ایک ترانہ گائیں۔
اس تقریب کے آغاز میں کچھ طالبعلموں نے حکومت کے خلاف نعرے بازی شروع کر دی جس پر سادہ کپڑوں میں ملبوس مرد اور خواتین سکیورٹی اہلکاروں نے انھیں برا بھلا کہا اور مارنا پیٹنا شروع کر دیا۔
End of سب سے زیادہ پڑھی جانے والی
ٹیچرز یونین کے بیان میں کہا گیا ہے کہ اس تقریب کے اختتام کے بعد جب طالبعلم اپنی کلاسوں میں واپس پہنچے تو سکیورٹی اہلکاروں نے سکول پر دھاوا بول دیا جس میں سات طالبعلم زخمی ہوئے جبکہ 10 کو گرفتار کر لیا گیا۔
یہ بھی پڑھیے
بیان میں کہا گیا کہ اسرا پناہی ان طالبات میں شامل تھیں جو اس تصادم میں زخمی ہو گئی تھیں اور ہسپتال میں وفات پا گئی ہیں۔
ایران کے سرکاری ٹیلی ویژن میں اسرا پناہی کے عزیز کا ایک بیان نشر کیا گیا کہ وہ پیدائشی دل کے عارضے میں مبتلا تھیں جس کی وجہ سے ان کی موت واقع ہوئی۔
ایران میں جاری احتجاج میں ہلاک ہونے والی نوجوان لڑکیوں، نکا شکارامی اور سرینا اسماعیل زادے، کے رشتہ داروں نے بھی اسی طرح کے بیان دیئے تھے۔
اردبیل سے ممبر پارلیمنٹ کاظم موسوی نے ددبان ایران نیوز سائٹ کو بتایا کہ اسرا پناہی نے خود کشی کی ہے۔
ایران کے مشہور سابق فٹ بال کھلاڑی علی دائی نے، جو اردبیل میں پیدا ہوئے تھے، مظاہروں کی حمایت کا اظہار کیا ہے۔
انھوں نے اپنے انسٹاگرام اکاؤنٹ پر ایک پوسٹ میں اسرا پناہی کے بارے میں حکومتی دعوؤں کو مسترد کرتے ہوئے حکام کو سچ بتانے کا چیلنج دیا۔ ان کا کہنا تھا کہ ’تاریخ نے ثابت کیا ہے کہ جھوٹے کون ہیں۔‘
اقوام متحدہ کے انسانی حقوق کے دفتر نے ایران میں مظاہرین کے خلاف سکیورٹی فورسز کے تشدد اور گرفتاریوں سمیت بچوں کے قتل اور حراست کی اطلاعات پر گہری تشویش کا اظہار کیا ہے۔
کچھ ذرائع بتاتے ہیں کہ سات صوبوں میں کم از کم 23 بچے ہلاک اور متعدد زخمی ہوئے ہیں۔
انھوں نے مزید کہا کہ متعدد سکولوں پر بھی چھاپے مارے گئے جبکہ کچھ پرنسپل سکیورٹی فورسز کے ساتھ تعاون نہ کرنے پر گرفتار کیے گئے۔
