سونیا گاندھی کا کانگریس کی عبوری صدارت قبول کرنے کا فیصلہ، صدر کا انتخاب اگلے اجلاس میں ہوگا
،تصویر کا ذریعہGetty Images
انڈیا کی حزب اختلاف کی سب سے بڑی جماعت کانگریس پارٹی کی ورکنگ کمیٹی نے سونیا گاندھی سے اگلے صدر کے انتظام کرنے تک عبوری صدر کی حیثیت سے کام جاری رکھنے کی درخواست کی جسے انھوں نے قبول کرلیا ہے۔
واضح رہے کہ سونیا گاندھی نے اعلان کیا تھا کہ وہ پارٹی کی صدارت سے مستعفی ہو رہی ہیں اور کہا ہے کہ ان کا جانشین چننے کا عمل شروع کیا جائے۔
پارٹی رہنماؤں کے سی وینوگوپال اور رندیپ سرجے والا نے ورکنگ کمیٹی کے اجلاس کی تفصیلات دیتے ہوئے پریس کانفرنس میں کہا کہ اس سلسلے میں متفقہ طور پر ایک قرارداد منظور کی گئی ہے۔
پارٹی کے ترجمان رندیپ سورجے والا نے کہا کہ پارٹی کے اجلاس کے اجلاس میں نئے صدر کا انتخاب کیا جائے گا۔
پارٹی کے ترجمانوں نے پارٹی کی اصلاحات کے بارے میں 23 رہنماؤں کے زیربحث خط کے بارے میں کہا کہ پارٹی نے فیصلہ کیا ہے کہ اب ہمیں اسے بھول کر آگے بڑھنا ہے۔
رندیپ سورجے والا نے کہا، ’اس ورکنگ کمیٹی میں بہت سے اہم رہنما شامل تھے اور ان کی رضامندی سے ہی پارٹی ورکنگ کمیٹی نے اتفاق رائے کمیٹی سے ایک قرار داد منظور کی ہے۔‘
پارٹی کے جنرل سکریٹری کے سی وینوگوپال نے بتایا کہ ورکنگ کمیٹی کے اجلاس میں پارٹی کے 52 رہنماؤں نے حصہ لیا۔
آسام کے صرف سابق وزیر اعلی ترون گوگوئی ان کی طبیعت کی وجہ سے اس اجلاس میں شریک نہیں ہوسکے۔
End of سب سے زیادہ پڑھی جانے والی
یہ بھی پڑھیے
سونیا گاندھی نے یہ اعلان مخالفین کی جانب سے ایک خط سامنے آنے کے بعد کیا جس میں ان کے ناقدین نے جماعت میں بڑے پیمانے پر تبدیلیوں اور اصلاحات کا مطالبہ کیا ہے۔
انڈیا کی آزادی میں سرگرم رہنے والی کانگریس پارٹی نے انڈیا پر کئی دہائیوں تک حکمرانی کی تاہم حالیہ انتخابات میں ان کی مقبولیت گھٹتی نظر آئی۔
اسی وجہ سے پارٹی کی قیادت پر بھی گاندھی خاندان کی حمایت کرنے پر تنقید کی گئی ہے کیونکہ تقسیم ہند کے بعد سے جماعت کا رہنما گاندھی خاندان کا ہی کوئی فرد ہوتا ہے۔
سنہ 2014 کے انتخابات میں کانگریس کو وزیر اعظم نریندر مودی کی بھارتیہ جنتا پارٹی کے ہاتھوں شکست ہوئی اور جماعت 543 اراکین کی پارلیمان میں صرف 44 نشستیں حاصل کرنے میں کامیاب ہوئی۔
اس کے بعد سے کانگریس کی مقبولیت میں بتدریج کمی آئی ہے اور کئی ایسی ریاستوں میں بھی اس کی طاقت کم پڑتی دکھائی دے رہی ہے جہاں وہ روایتی طور پر حکومت میں رہی ہے۔
،تصویر کا ذریعہGetty Images
سنہ 2019 کے انتخابات بھی کانگریس کے لیے زیادہ حوصلہ افزا نہیں تھے اور کئی مبصرین کے مطابق اس سے ثابت ہوتا ہے کہ جماعت انڈیا کے حالیہ وٹرز میں کتنی غیر مقبول ہو گئی ہے۔
اس وقت کانگریس کی صرف چھ ریاستوں میں حکومت ہے جن میں سے چار میں وہ مخلوت حکومت کا حصہ ہے۔
سونیا گاندھی کے نقادوں کا کیا مؤقف ہے؟
جماعت کے 23 سینیئر رہنماؤں کی جانب سے لکھے گئے خط نے ایک نیا تنازع کھڑا کر دیا ہے کیونکہ یہ پہلا موقع ہے جب کانگریس کی اپنی قیادت نے اتنے عوامی انداز میں پارٹی میں کے اندر بڑے پیمانے پر اصلاحات متعارف کروانے کی ضرورت پر زور دیا ہے۔
سیاسی مبصرین کے مطابق اس سے ظاہر ہوتا ہے کہ پارٹی کے پرانے اور نوجوان کارکنوں کے درمیان خلیج کتنا بڑا ہے۔
اطلاعات کے مطابق یہ خط گذشتہ ہفتے لکھا گیا لیکن اتوار کو منظر عام پر آیا جب اسے روزنامہ انڈین ایکسپریس نے شائع کیا۔
خط میں کانگریس رہنماؤں نے کئی مطالبے کیے ہیں جن میں ایک ’خودمختار انتخابی اتھارٹی‘ کا قیام اور جماعت کی تنظیم نو کے لیے رہنما اصول مرتب کرنے کے مطالبے شامل ہیں۔
اس خط پر مسلمان رہنما غلام نبی آزاد، منیش تیواری اور سابق وزرا ششی تھرور اور کپل سیبال شامل ہیں۔
سونیا گاندھی نے بھی خط پر فوری ردعمل دیتے ہوئے پارٹی کے نئے صدر کے انتخاب کا مطالبہ کیا ہے تاہم اب بھی جماعت میں کئی حلقے ایسے ہیں جو چاہتے ہیں کہ سونیا گاندھی ہی پارٹی کی صدر رہیں۔
تاہم اطلاعات کے مطابق سونیا گاندھی نے پارٹی کی قیادت کو بتا دیا ہے کہ وہ صدارتی چھوڑنا چاہتی ہیں۔ انھوں نے یہ عہدہ 2019 میں عارضی طور اس وقت سنبھالا تھا جب ان کے صاحبزادے راہل انتخابات میں شکست کے بعد مستعفی ہوگئے تھے۔
