آخر یہ جے این یو کیا بلا ہے؟
،تصویر کا ذریعہGetty Images
- مصنف, مرزا اے بی بیگ
- عہدہ, بی بی سی اردو ڈاٹ کام، دہلی
انڈیا میں جب سے قوم پرست ہندو تنظیم بی جے پی بر سراقتدار آئی ہے اس وقت سے دارالحکومت دہلی میں قائم تعلیمی ادارہ جواہر لعل نہرو یونیورسٹی ان کے اور سخت گیر ہندو تنظیموں کے نشانے پر ہے۔
ایک معروف صحافی اپوروا نند کا تو خیال ہے کہ قوم پرست ہندو تنظیم آر ایس ایس یا خود بی جے پی کا دھیان جس قدر پاکستان پر ہوتا ہے اس سے کم جے این یو پر نہیں رہتا ہے۔
جے این یو میں گذشتہ روز سٹوڈنٹ یونین کے انتخابات ہوئے جہاں بی جے پی کی طلبہ شاخ اے بی وی پی کو بائیں بازو کے اتحاد نے چاروں خانے چت کر دیا۔
سوشل میڈیا پر اس کی بازگشت نظر آئی۔ بعض صارفین نے طنز کرتے ہوئے لکھا کہ 'اگر الیکٹرانک ووٹنگ مشین کا استعمال ہوتا تو جیت اے بی وی پی کی ہوتی۔'
یہ بھی پڑھیے
End of سب سے زیادہ پڑھی جانے والی
جبکہ ایک دوسرے صارف نے کہا کہ 'وزیر اعظم مودی کی مہم 'کلین انڈیا' کا آغاز جے این یو سے ہو گیا ہے۔' ان کا بظاہر اشارہ انڈیا کو بی جے پی اور ان کی اتحادی پارٹیوں سے پاک کرنے کی جانب تھا۔
جے این یو کے بارے میں گذشتہ تین سال سے تنازع سرخیوں میں ہے۔ اس دوران جے این یو کے خلاف اس قدر باتیں کہی گئی ہیں کہ بہت سے لوگوں کا خیال ہے کہ اسے بند کر دینا چاہیے۔ جبکہ آر ایس ایس اور بی جے پی اسے اپنے قبضے لینے کا عرصے سے آرزو مند رہا ہے۔ اس ادارے پر طرح طرح کے الزامات لگائے گئے ہیں۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 1
اسے 'شہری ماؤ نوازوں کی پناہ گاہ' کہا گیا اور مرکزی وزیروں نے تو یہاں تک دعوی کیا کہ ان کے پاس خفیہ اطلاعات ہیں کہ جے این یو کے کمیونسٹ طلبہ کا رشتہ سرحد پار سرگرم شدت پسند تنظیموں سے ہے۔
آخر جے این یو کیا ہے؟
جے این یو کا خیال انڈیا کے پہلے وزیر اعظم پنڈت جواہر لعل کی موت کے بعد ان کو خراج عقیدت پیش کرنے کے طور پر پیدا ہوا اور پھر اس کا قیام عمل میں آیا لیکن یہ کبھی بھی کانگریس پارٹی کی آنکھوں کا تارا نہ بن سکا۔
یہ ادارہ انڈیا میں ایمرجنسی کے دور (79-1977) میں سرخیوں میں آیا جب وہاں اس وقت کی وزیر اعظم اندرا گاندھی اور ان کی نافذ کردہ ایمرجنسی کی مخالفت زوروں پر ہوئی اور وہاں کے طلبہ نے اس میں کلیدی کردار ادا کیا۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 2
اسے شروع سے ہی بائیں بازو کے گڑھ کے طور پر دیکھا جاتا رہا ہے جہاں پہلے مقابلہ بائیں بازو کے مختلف دھڑوں (ایس ایف آئی، اے آئی ایس ایف، اے آئی ایس اے، یو ڈی ایف وغیرہ) کے درمیان ہی ہوتا تھا لیکن دنیا میں کمیونزم کے کمزور ہونے اور ملک میں ہندو قوم پرست جماعتوں کے قدم جمانے کے ساتھ جے این یو کی فضا بھی بدلی اور کانگریس کی سٹوڈنٹ ونگ این ایس یو آئی اور بی جے پی کی سٹوڈنٹ ونگ اے بی وی پی نے یہاں پاؤں جمانے شروع کیے لیکن انھیں کبھی خاطر خواہ کامیابی نہیں ملی۔
جے این یو دوسری بار اس وقت دنیا میں سرخیوں میں آيا جب سویت روس کا دور ختم ہوا اور روس سے ایک درجن سے زیادہ ممالک آزاد ہوئے۔ اس زمانے میں بھی جب جے این یو میں سٹوڈنٹ یونین کے انتخابات میں مسلسل بائیں بازو کی جیت ہوتی رہی تو امریکہ کی ہارورڈ یونیورسٹی میں ایک سیمینار میں اس بات پر بحث ہوئی کہ آخر جے این یو میں بائیں بازو کے نظریات کمزور کیوں نہیں ہو رہے ہیں۔
،تصویر کا ذریعہABHIMANYU KUMAR SAHA/BBC
گذشتہ تین سال سے جے این یو مسلسل خبروں میں ہے اور یہ تنازع اس وقت شروع ہوا جب وہاں منعقدہ ایک پروگرام پر یہ الزام لگایا گیا کہ وہاں پاکستان کے حق میں اور 'انڈیا کے ٹکڑے ٹکڑے' ہونے کے نعرے لگائے گئے۔
اس زمانے میں جے این یو سٹوڈنٹ یونین کے صدر کنہیا کمار اور ان کے ساتھ خالد عمر، انربان اور دیگر طلبہ پر ملک سے غداری کے الزمات لگے اور انھیں جیل بھی ہوئی لیکن پھر انھیں رہائی نصیب ہوئی جبکہ ابھی تک پولیس ان کے خلاف چارج شیٹ داخل کرنے میں ناکام رہی ہے۔
جے این یو سائنس کے بجائے اپنے ہیومنٹیز کے شعبے کے لیے جانا جاتا ہے جہاں رومیلا تھاپر، بپن چندر، ہربنس مکھیا جیسے تاریخ داں نہ صرف وہاں کے طلبہ کی تعلیم اور ذہن سازی کا کام کرتے رہے ہیں بلکہ ان کی تحریر کردہ کتابیں ملک کے طول عرض میں بچوں میں تاریخی فہم پیدا کرنے کی ضامن رہی ہیں۔
،تصویر کا ذریعہHindustan Times
دوسری جانب اردو اور ہندی زبان کے شعبے میں وہاں محمد حسن، نامور سنگھ، شارب رودولوی، مینجر پانڈے جیسے ناقدین رہے ہیں جنھوں نے ادب کی معروضی اور مارکسی تنقید کی ہے اور ان کے پڑھائے طلبہ ملک کی مختلف یونیورسٹیوں اور کالجوں میں پڑھا رہے ہیں۔
اپوروانند لکھتے ہیں: 'ہندی میں ہر کسی کا خواب نامور سنگھ بننے کا رہتا ہے۔ کچھ نہیں تو ان سے تعلیم حاصل کیا ہوا ہونا بھی بڑی صلاحیت مانی جاتی ہے۔ یہ اس ہندی کا حال ہے جس کے بغیر ہندی، ہندو، ہندوستان بن ہی نہیں سکتا۔'
،تصویر کا ذریعہGetty Images
جے این یو آر ایس ایس کے افکارو خیالات کی ترویج میں بڑی رکاوٹ ہے اور وہ ہر جگہ اسے نہ صرف چیلنج کرتا نظر آتا ہے بلکہ ہندو سخت گیر تنظیموں کے پاس ان کا جواب بھی نہیں ہے۔
گذشتہ برسوں میں جے این یو اور اس کے کمیپس کی سرگرمیوں پر مبنی فلم 'رانجھنا' آئی تھی۔
مختصراً یہ کہا جا سکتا ہے کہ دارالحکومت دہلی میں موجود یہ تعلیمی گہوارہ انڈیا میں اظہار رائے کی آزادی کی مشعل تھامے ہوئے ہے اور یہی چیز سخت گیر تنظیموں کو سب سے زیادہ کھٹکتی ہے۔
