آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
چین: شنگھائی ایئرپورٹ پر کوکین سے بنے سوٹ کیس پکڑے گئے
چین میں حکام نے شنگھائی ایئرپورٹ پر ایک خاتون کو گرفتار کیا ہے جو کوکین سے بنے ہوئے دو سوٹ کیسوں کو ملک میں سمگل کرنے کی کوشش کر رہی تھی۔
اطلاعات کے مطابق جب کسٹم حکام کو لاطینی امریکہ کے ایک ملک سے آنے والی ایک خاتون کےسوٹ کیسوں کے بارے میں شک گزارا تو انھوں نے سوٹ کیس کی مالک خاتون کو اسے خالی کرنے کے لیے کہا لیکن کسٹم حکام کو اس میں کچھ نہ ملا۔
اس سوٹ کیس کا ایکسرے کرنے پر معلوم ہوا کہ ان کا رنگ عام سے زیادہ سیاہی مائل تھا۔ سوٹ کیس کو خالی کیے جانے کے باوجود اس کا وزن عام سوٹ کیسوں سے زیادہ تھا۔ مزید ٹیسٹ کرنے پر معلوم ہوا کہ دونوں سوٹ کیسوں کو دس کلو کوکین سے بنایا گیا تھا۔
حکام نے لاطینی امریکہ کے ملک سے آنے والی اس خاتون کو رواں سال فروری میں گرفتار کیا تھا لیکن پولیس نے اس کی اطلاعات اب جاری کی ہے۔
ماضی میں ایسے واقعات ہوئے ہیں جب سمگلروں نے منشیات کو کسٹم حکام سے چھپانے کے لیے نئے نئے طریقے استعمال کیے لیکن یہ پہلا موقع ہے کہ کوکین کے مواد سے بنائےگئے سوٹ کیسوں کو کسٹم حکام کے سامنے سے گذارنے کی کوشش کی گئی ہے۔
اس سے پہلے چین میں ایسے واقعات پیش آئے ہیں جب ایک شخص نے اپنی ٹانگ کو کوکین کے سفوف سے لپیٹ رکھا تھا۔ گذشتہ ماہ ایک چینی جوڑے کو اس وقت گرفتار کیا تھا جب وہ کوکین کو انگور سے بنی شراب میں گھول کر ملک میں لانے کی کوشش کر رہے تھے۔
یورپ میں بھی ایسے واقعات سامنے آ چکے ہیں جب سمگلروں نے کوکین کو سریش کی مدد سے اسے سخت میٹریل میں تبدیل کر کے اسے سمگل کرنے کی کوشش کی ۔
چین میں کوکین بہت ہی کم دستیاب ہے اور اسے سمگل کرنے کی کوشش کرنے والی خاتون کو اس کی بھاری قیمت چکانی ہو گی۔
End of سب سے زیادہ پڑھی جانے والی
چین کے قانون کے مطابق اگر کسی شخص پر 50 گرام سے زیادہ کی کوکین سمگل کرنے کا الزام ثابت ہو جائے تو اسے موت کی سزا دی جاتی ہے۔
