ادریس بختیار کراچی

	خان صاحب کی صحافتی زندگی نصف صدی پر محیط ہے

احمد علی خان، جنہیں ان کے دوست اور مداحوں کے حلقے میں خان صاحب کہا جا تا تھا، 1924 میں بھوپال میں پیدا ہوئے اور اپنے آبائی وطن سے ہی انہوں نے 1945 میں صحافتی زندگی کا آغاز کیا جہاں وہ ترجمان میں کام کیا کرتے تھے۔

انہوں نے برصغیر کی تقسیم سے پہلے دہلی میں ’ڈان‘ میں شمولیت اختیار کی اور قیامِ پاکستان کے بعد جب ’ڈان‘ کی اشاعت کراچی سے شروع ہوئی تو وہ بھی یہاں آگئے۔

کوئی دو سال بعد لاہور چلے گئے اور وہاں پاکستان ٹائمز سے وابستہ ہو گئے جہاں انہیں فیض احمد فیض، مظہر علی خان اور ظہیر صدیقی جیسے اکابرین کی صحبت میسر آئی۔ خان صاحب 13 سال تک پاکستان ٹائمز کے ساتھ رہے اور 1962 میں اسسٹنٹ ایڈیٹر کی حیثیئت سے ’ڈان‘ واپس آ گئے۔

وہ 1976 میں ڈان کے ایڈیٹر بنے۔ پھر چیف ایڈیٹر اور بعد میں ایڈیٹر انچیف بن گئے اور سن 2000 میں ریٹائرمنٹ تک اس عہدے پر فائز رہے۔

تین سال بعد وہ تھوڑے عرصے کے لیے دوبارہ ڈان میں آگئے تھے۔ انہیں طویل عرصہ تک ایڈیٹر رہنے کا اعزاز حاصل ہے جبکہ انکی صحافتی زندگی نصف صدی پر محیط ہے۔

خان صاحب نے قید و بند کی صعوبتیں بھی کاٹیں۔ بائیں بازو کی تنظیموں اور ترقی پسند عناصر کے خلاف کارروائی کے دوران انہیں سکیورٹی ایکٹ کے تحت بند کر دیا گیا تھا۔

وہ زندگی میں کئی بار آمرانہ حکومتوں اور حکومتوں کے آمرانہ رویوں کا نشانہ بنے مگر انہوں نے ہمیشہ استقامت کا مظاہرہ کیا۔ خان صاحب نے حکومت کی جانب سے ایوارڈ دیے جانے کی پیشکش دو مرتبہ مسترد کی۔

احمد علی خان نے اپنی اہلیہ محترمہ ہاجرہ مسرور اور دو بیٹیوں اور بہت سے مداحوں کو سوگوار چھوڑا ہے۔ انہیں شام گئے سپرد خاک کردیا گیا۔